Gomti River: నదిలో దూకి ప్రేమజంట ఆత్మహత్యాయత్నం.. కాపాడి ప్రియుడి చెంప పగలగొట్టిన మత్స్యకారుడు.. వీడియో ఇదిగో!
- ఉత్తరప్రదేశ్‌లోని సుల్తాన్‌పూర్‌లో ఘటన
- జంట నదిలోకి దూకడం చూసిన మత్స్యకారులు
- వెంటనే దూకి రక్షించి బయటకు తీసుకొచ్చిన మత్స్యకారుడు
- ఆ వెంటనే ఆగ్రహంతో ఊగిపోతూ మూడు, నాలుగుసార్లు చెంప పగలగొట్టిన వైనం
నదిలోకి దూకి ఆత్మహత్యకు యత్నించిన ప్రేమజంటను కాపాడిన ఓ మత్స్యకారుడు ఆపై ప్రియుడి చెంప పగలగొట్టాడు. ఉత్తరప్రదేశ్‌లోని సుల్తాన్‌పూర్‌లో జరిగిందీ ఘటన. ఇందుకు సంబంధించిన వీడియో సోషల్ మీడియాలో వైరల్ అవుతోంది. కొత్వాలి నగరంలోని గోలాఘాట్ వద్ద గోమతి నదిలోకి ఓ జంట దూకడం చూసిన అక్కడే ఉన్న మత్స్యకారులు వెంటనే అప్రమత్తమయ్యారు. ఓ మత్స్యకారుడు నదిలోకి దూకి వారిని రక్షించి బయటకు తీసుకొచ్చాడు.
ఆ వెంటనే అతడు ప్రేమికుడి చెంప పగలగొట్టాడు. అతడు చేసిన పనికి ఆగ్రహంతో ఊగిపోయిన మత్స్యకారుడు జీవితం ఎంత విలువైనదో చెబుతూ మూడు, నాలుగు సార్లు బలంగా చెంపపై కొట్టడం వీడియోలో కనిపించింది. ఆ తర్వాత ఒడ్డుకు తీసుకొచ్చి కూర్చోబెట్టారు. యువతి కొంత అస్వస్థతకు గురైంది. అయితే, వారి ప్రాణాలకు వచ్చిన ముప్పేమీ లేదని, ఆరోగ్యం నిలకడగా ఉందని పోలీసులు తెలిపారు.