YouTube: కూకట్‌పల్లిలో రోడ్డుపై నోట్లు విసిరిన యూట్యూబర్ హర్ష అరెస్ట్
- మోతీనగర్‌లో ఉంటున్న యూట్యూబర్ హర్ష
- జూన్‌లో కూకట్‌పల్లి మెట్రో స్టేషన్ సమీపంలో నోట్లను వెదజల్లిన హర్ష
- న్యూసెన్స్ కేసు నమోదు చేసిన కూకట్‌పల్లి పోలీసులు
కూకట్‌పల్లిలో నడిరోడ్డుపై నోట్లను గాల్లోకి వెదజల్లిన యూట్యూబర్ హర్షను కూకట్‌పల్లి పోలీసులు అరెస్ట్ చేశారు. హర్ష సోషల్ మీడియాలో గుర్తింపు కోసం డబ్బులు వెదజల్లుతూ... ఆ వీడియోలను తన ఇన్‌స్టాగ్రాంలో పోస్ట్ చేశాడు.
హర్ష అలియాస్ వంశీ పవర్ మోతీనగర్ పరిధిలోని పర్వత్ నగర్‌లో ఉంటున్నాడు. ఇన్‌స్టాగ్రాంలో తరుచూ పలు అంశాలపై మాట్లాడుతూ వీడియోలు పోస్ట్ పెడుతుంటాడు. ఇటీవల పలుచోట్ల నగదును దాచిపెడుతూ... వాటిని వెతికి ఆ డబ్బులు తీసుకోవాలని తన ఫాలోవర్స్‌కు సూచిస్తూ వీడియోలు చేశాడు.
ఇటీవలి కాలంలో కొన్నిచోట్లకు వెళ్లి... డబ్బును వెదజల్లుతూ... ఆ వీడియోలను పోస్ట్ చేస్తున్నాడు. రెండు నెలల క్రితం... జూన్‌లో కూకట్‌పల్లి మెట్రో రైల్వే స్టేషన్ సమీపంలో నోట్లను వెదజల్లాడు. ఆ డబ్బును ఏరుకోవడానికి పెద్ద ఎత్తున జనం గుమికూడారు. ఆ వీడియోలు నెట్టింట వైరల్‌గా మారాయి. దీంతో పోలీసులు అతనిపై న్యూసెన్స్ కేసు నమోదు చేసి, ఈరోజు అరెస్ట్ చేశారు.