Anushka: అనుష్క విశ్వరూపమే 'ఘాటి'... ఉత్కంఠను పెంచుతున్న గ్లింప్స్!
- అనుష్క ప్రధానమైన పాత్రగా 'ఘాటి'
- గిరిజన ప్రాంతం నేపథ్యంలో సాగే కథ
- దర్శకత్వం వహిస్తున్న క్రిష్
- అంచనాలు పెంచుతున్న గ్లింప్స్
అందాల అనుష్క కెరియర్ ను పరిశీలిస్తే, 2018 నుంచి ఆమె సినిమాల సంఖ్యను తగ్గించడం కనిపిస్తుంది. అప్పటి నుంచి ఏడాదికి ఒక సినిమా చేస్తూ వచ్చిన ఆమె, ఆ తరువాత సినిమాకి .. సినిమాకి మధ్య ఎక్కువ గ్యాప్ ఇవ్వడం అభిమానులను నిరాశ పరుస్తోంది. అయితే సినిమాలు తగ్గించినా ఆమె పట్ల ప్రేక్షకులకుగల అభిమానం ఎంతమాత్రం తగ్గకపోవడం విశేషం.
ఈ నేపథ్యంలోనే ఆమె తాజా చిత్రమైన 'ఘాటి' నుంచి గ్లింప్స్ ను రిలీజ్ చేశారు. ఈ రోజున అనుష్క పుట్టినరోజు కావడంతో, ఈ సందర్భాన్ని పురస్కరించుకుని ఈ సినిమా నుంచి గ్లింప్స్ ను వదిలారు. ఈ కథ అడవికి సమీపంలోని ఒక గిరిజన ప్రాంతంలో నడుస్తోందనే విషయం, ఈ గ్లింప్స్ వలన అర్థమవుతోంది. అనుష్క గిరిజన ప్రాంతానికి చెందిన మహిళగా కనిపిస్తూ మరింత కుతూహలాన్ని పెంచింది.
ఒక బస్సులోకి ఆవేశంగా ఎక్కిన ఆమె, ఒక వ్యక్తి మెడను పరపరా కోసేసి, తల తీసుకుని దిగిరావడం ఈ గ్లింప్స్ లో చూపించారు. ఆ మహిళకి ఏదో తీరని అన్యాయం జరిగిందనే విషయం ఆమె ఎక్స్ ప్రెషన్ వలన తెలుస్తోంది. క్రిష్ దర్శకత్వం వహిస్తున్న ఈ సినిమాకి, విద్యాసాగర్ సంగీతాన్ని అందిస్తున్నారు. ఫస్టు ఫ్రేమ్ బ్యానర్ పై నిర్మితమవుతున్న ఈ సినిమాను తెలుగుతో పాటు... తమిళ, మలయాళ, కన్నడ, హిందీ భాషలలోనూ విడుదల చేయనున్నారు.