Stanford University: కొద్దిరోజుల యాంటీబయాటిక్ వాడకంతోనే పేగుల్లో నిరోధకత: అధ్యయనంలో వెల్లడి

యాంటీబయాటిక్ మందులను కొద్ది రోజుల పాటు వాడినా, మన పేగుల్లోని బాక్టీరియాలో వాటిని తట్టుకునే శక్తి (నిరోధకత) దీర్ఘకాలం పాటు అభివృద్ధి చెందుతుందని తాజా అధ్యయనం ఒకటి హెచ్చరిస్తోంది. యాంటీమైక్రోబియల్ రెసిస్టెన్స్ (AMR) ప్రపంచవ్యాప్తంగా పెను ఆరోగ్య సమస్యగా మారుతున్న నేపథ్యంలో ఈ పరిశోధన ప్రాధాన్యత సంతరించుకుంది.

అమెరికాలోని స్టాన్‌ఫర్డ్ విశ్వవిద్యాలయ పరిశోధకులు, సాధారణంగా అనేక రకాల బాక్టీరియల్ ఇన్ఫెక్షన్ల చికిత్సకు ఉపయోగించే సిప్రోఫ్లోక్సాసిన్ అనే యాంటీబయాటిక్‌పై దృష్టి సారించారు. ఆరోగ్యంగా ఉన్న 60 మంది వయోజనులకు ఐదు రోజుల పాటు రోజుకు రెండుసార్లు చొప్పున సిప్రోఫ్లోక్సాసిన్ ఇచ్చి, వారి మల నమూనాలను సేకరించి విశ్లేషించారు.

ఈ పరిశోధనలో, కేవలం ఐదు రోజుల యాంటీబయాటిక్ వాడకం తర్వాత కూడా పేగుల్లోని బాక్టీరియాలో జన్యుపరమైన మార్పులు (మ్యుటేషన్లు) చోటుచేసుకున్నాయని కనుగొన్నారు. ముఖ్యంగా, యాంటీబయాటిక్‌ను నిరోధించే 'gyrA' అనే జన్యువులో మార్పులు గుర్తించారు. ఈ మార్పుల వల్ల అభివృద్ధి చెందిన నిరోధకత, మందులు వాడటం ఆపేసిన తర్వాత 10 వారాలకు పైగా కొనసాగిందని, కొన్ని సందర్భాల్లో ఏడాది వరకు కూడా ఉండవచ్చని పరిశోధకులు అంచనా వేశారు.

చికిత్సకు ముందు పేగుల్లో అధిక సంఖ్యలో ఉన్న బాక్టీరియాలోనే ఈ నిరోధకత ఎక్కువగా అభివృద్ధి చెందినట్లు గమనించారు. కొద్దికాలం పాటు యాంటీబయాటిక్స్ వాడకం కూడా పేగుల్లోని సహజ బాక్టీరియాపై దీర్ఘకాలిక ప్రభావాన్ని చూపుతుందని, నిరోధకత పరిణామానికి దోహదపడుతుందని ఈ అధ్యయనం స్పష్టం చేస్తోంది. అనవసర యాంటీబయాటిక్ వాడకం వల్ల భవిష్యత్తులో ఇన్ఫెక్షన్ల చికిత్స కష్టతరం కావచ్చని పరిశోధకులు హెచ్చరిస్తున్నారు. ఈ అధ్యయన వివరాలు 'నేచర్' జర్నల్‌లో ప్రచురితమయ్యాయి.