Ox: ఇదెక్కడి వింత.. స్కూటర్ నడిపిన ఎద్దు.. వీడియో ఇదిగో!

ఉత్తరాఖండ్‌లోని ప్రఖ్యాత పుణ్యక్షేత్రం రిషికేశ్‌లో ఓ వింత ఘటన చోటు చేసుకుంది. రోడ్డు పక్కన పార్క్ చేసిన స్కూటర్ ఎక్కిన ఎద్దు అనూహ్యంగా దానిని రైడ్ చేస్తూ ముందుకు దూసుకెళ్లింది. అక్కడి సీసీటీవీ కెమెరాలో రికార్డయిన ఈ దృశ్యాలు వెలుగులోకి వచ్చి అందరినీ ఆశ్చర్యపరుస్తున్నాయి. రిషికేశ్‌లోని ఓ రహదారి దాదాపు జనసంచారం లేకుండా ప్రశాంతంగా ఉంది. ఆ సమయంలో ఓ ఎద్దు ఆ మార్గంలో సంచరిస్తూ కనిపించింది. కొద్దిసేపు అటూ ఇటూ తిరిగి రోడ్డు పక్కన నిలిపి ఉన్న ఓ స్కూటర్ వద్దకు చేరింది. ఎవరూ ఊహించని విధంగా, అది ఒక్కసారిగా స్కూటర్ మీదకు ఎక్కి సీటుపై కూర్చుంది.

అంతటితో ఆగకుండా తన కాళ్లతో స్కూటర్‌ను నెమ్మదిగా ముందుకు కదిలించింది. సాధారణంగా జంతువులు, ముఖ్యంగా పశువులు ఇలా వాహనాలపైకి ఎక్కడం లేదా వాటితో విన్యాసాలు చేయడం ఉండదు. కానీ ఈ ఎద్దు ప్రవర్తన అందుకు భిన్నంగా ఉండటం గమనార్హం. నిర్మానుష్యంగా ఉన్న రోడ్డుపై జరిగిన ఈ విచిత్ర సంఘటన తాలూకు దృశ్యాలు ఇప్పుడు వెలుగులోకి వచ్చి వైరల్ అవుతున్నాయి.