Manohar Lal: దివ్యాంగులకు కేంద్ర ప్రభుత్వం తీపి కబురు.. ఇళ్ల కేటాయింపులో రిజర్వేషన్

దివ్యాంగులకు కేంద్ర ప్రభుత్వం ఒక ముఖ్యమైన శుభవార్తను అందించింది. కేంద్ర ప్రభుత్వ గృహాల కేటాయింపులో దివ్యాంగులకు 4 శాతం రిజర్వేషన్ కల్పిస్తూ కేంద్ర మంత్రి మనోహర్ లాల్ గురువారం ఒక కీలక నిర్ణయం తీసుకున్నారు. పౌరులందరికీ సమాన అవకాశాలు కల్పించాలనే ప్రభుత్వ నిబద్ధతను 'సుగమ్య భారత్ అభియాన్' కింద మరోసారి చాటిచెప్పడమే ఈ నిర్ణయం వెనుక ఉన్న ముఖ్య ఉద్దేశమని కేంద్ర గృహనిర్మాణ మరియు పట్టణ వ్యవహారాల మంత్రిత్వ శాఖ ఒక ప్రకటనలో వెల్లడించింది.

దివ్యాంగుల హక్కుల చట్టం, 2016 స్ఫూర్తికి అనుగుణంగా ఈ నిర్ణయం తీసుకున్నట్లు మంత్రిత్వ శాఖ తెలిపింది. కేంద్ర ప్రభుత్వ నివాస గృహాలను దివ్యాంగులకు సముచితంగా అందుబాటులోకి తెచ్చేందుకు డైరెక్టరేట్ ఆఫ్ ఎస్టేట్స్ ఒక అధికారిక మెమోరాండం జారీ చేసిందని పేర్కొంది.

"ప్రతి పౌరుడి సాధికారత పట్ల ప్రభుత్వానికి ఉన్న అంకితభావానికి ఈ చొరవ నిదర్శనం. సమ్మిళిత మరియు అందరికీ అందుబాటులో ఉండే భారతదేశ నిర్మాణానికి ఇది మరింత బలాన్ని చేకూరుస్తుంది" అని ఆ ప్రకటనలో వివరించారు.