Vetrimaaran: ధనుష్‌తో మనస్పర్థలు ప్రచారంపై స్పందించిన ప్రముఖ దర్శకుడు

ప్రముఖ తమిళ దర్శకుడు వెట్రిమారన్, స్టార్ హీరో ధనుష్‌ల మధ్య విభేదాలు తలెత్తాయని కొంతకాలంగా జరుగుతున్న ప్రచారానికి ఆయన తెరదించారు. తన తదుపరి చిత్రాన్ని నటుడు శింబుతో చేయనుండటమే ఈ పుకార్లకు కారణం కాగా, ఈ వార్తల్లో ఎలాంటి నిజం లేదని వెట్రిమారన్ స్పష్టం చేశారు. ఆన్‌లైన్‌లో జరుగుతున్న ఈ ప్రచారం తనను ఎంతగానో బాధించిందని ఆయన ఆవేదన వ్యక్తం చేశారు.

తన తదుపరి ప్రాజెక్ట్ వివరాలను వెల్లడిస్తూ, వెట్రిమారన్ పలు కీలక విషయాలు పంచుకున్నారు. "సూర్యతో ప్రకటించిన 'వాడి వాసల్' చిత్రం కొన్ని కారణాల వల్ల ఆలస్యం అవుతోంది. ఈ సమయంలో నేను శింబును కలిసి ఒక కథ చెప్పాను. ఆయనకు కథ బాగా నచ్చడంతో వెంటనే అంగీకరించారు. ఈ సినిమాకు ధనుష్ నిర్మాతగా వ్యవహరిస్తున్నారు" అని ఆయన తెలిపారు. ఈ కథ 'వడ చెన్నై' సినిమా ప్రపంచం నేపథ్యంలో సాగుతుందని, అయితే ఇది ఆ చిత్రానికి సీక్వెల్ మాత్రం కాదని ఆయన స్పష్టం చేశారు.

'వడ చెన్నై' సినిమాకు సంబంధించిన పూర్తి హక్కులు ధనుష్ వద్దే ఉన్నాయని వెట్రిమారన్ గుర్తుచేశారు. "ఈ విషయంపై నేను ధనుష్‌తో చర్చించాను. శింబుతో సినిమా చేస్తున్నానని చెప్పగానే, ఆయన ఎలాంటి అభ్యంతరం చెప్పలేదు. ప్రాజెక్ట్ కోసం ఒక్క రూపాయి కూడా అడగకుండా నిరభ్యంతర పత్రం (ఎన్‌వోసీ) ఇస్తానని హామీ ఇచ్చారు. ఈ విషయాలు తెలియకుండా చాలామంది మా మధ్య గొడవలు ఉన్నట్లు తప్పుడు ప్రచారం చేస్తున్నారు" అని ఆయన పేర్కొన్నారు.

ధనుష్ తనకు ఎంతో అండగా నిలిచారని వెట్రిమారన్ ఈ సందర్భంగా తెలిపారు. "నా పనిలో ధనుష్ ఎప్పుడూ జోక్యం చేసుకోలేదు. నిజానికి, నేను ఇటీవల కొన్ని ఆర్థిక ఇబ్బందులు ఎదుర్కొన్నాను. ఆ సమయంలో ధనుష్ నాకు అడ్వాన్స్ ఇచ్చి ఆదుకున్నారు" అని ఆయన వెల్లడించారు. మరోవైపు, శింబు, ధనుష్‌ల మధ్య కూడా మంచి అనుబంధం ఉందని, ఈ సినిమా విషయంలో వారిద్దరూ ఎంతో ఉత్సాహంగా ఉన్నారని వెట్రిమారన్ అన్నారు.