Neeraj Chopra: బెంగళూరులో నీరజ్ చోప్రా గోల్డెన్ ధమాకా.. సొంత టోర్నీలో అద్భుత ప్రదర్శన

భారత స్టార్ జావెలిన్ త్రోయర్, ఒలింపిక్ ఛాంపియన్ నీరజ్ చోప్రా స్వదేశీ గడ్డపై అద్భుతం చేశాడు. తన పేరుతోనే బెంగళూరులో తొలిసారిగా నిర్వహించిన 'నీరజ్ చోప్రా క్లాసిక్ 2025' పోటీలో స్వర్ణ పతకాన్ని సాధించాడు. ఏళ్ల తర్వాత భారత గడ్డపై పోటీ పడుతున్న నీరజ్‌ను చూసేందుకు శ్రీ కంఠీరవ స్టేడియానికి అభిమానులు పెద్ద సంఖ్యలో తరలివచ్చారు. వారి కేరింతల మధ్య నీరజ్ అద్వితీయ ప్రదర్శన కనబరిచాడు.

శనివారం జరిగిన ఈ ఫైనల్ పోరులో నీరజ్ తన మూడో ప్రయత్నంలో జావెలిన్‌ను 86.18 మీటర్ల దూరం విసిరి అగ్రస్థానంలో నిలిచాడు. అంతకుముందు తొలి ప్రయత్నంలో ఫౌల్ చేసినప్పటికీ, ఏమాత్రం ఒత్తిడికి గురికాకుండా తనదైన శైలిలో పుంజుకున్నాడు. అనంతరం 84.07 మీటర్లు, 82.22 మీటర్ల త్రోలతో నిలకడను ప్రదర్శించాడు. ప్రపంచ స్థాయి అథ్లెట్లు పోటీపడిన ఈ ఈవెంట్‌లో కెన్యాకు చెందిన జూలియస్ యెగో 84.51 మీటర్లతో రజత పతకాన్ని గెలుచుకున్నాడు. శ్రీలంక అథ్లెట్ రుమేష్ పతిరగే 84.34 మీటర్ల త్రోతో కాంస్య పతకాన్ని దక్కించుకున్నాడు. భారత్‌కే చెందిన మరో అథ్లెట్ సచిన్ యాదవ్ 82.23 మీటర్లతో నాలుగో స్థానంలో నిలిచాడు.

బెంగళూరులో వరల్డ్ అథ్లెటిక్స్ గోల్డ్-స్థాయి జావెలిన్ ఈవెంట్ జరగడం ఇదే మొదటిసారి. ఈ పోటీలో స్టార్ అథ్లెట్‌గానే కాకుండా నిర్వాహకుడిగానూ నీరజ్ చోప్రా వ్యవహరించడం విశేషం. ఈ విజయంతో అతను తన ఆధిపత్యాన్ని మరోసారి నిరూపించుకోవడమే కాకుండా, భారత యువ అథ్లెట్లకు స్ఫూర్తిగా నిలిచాడు.