దొంగిలించిన వందలాది టీకాలను వెనక్కు ఇచ్చేసిన 'మంచి దొంగ'!

అతనో దొంగ. చేతికి దొరికిన టీకాల బాక్స్ ను దొంగిలించుకుని పోయాడు. హర్యానాలోని జింద్ ప్రాంతంలో ఈ ఘటనపై పోలీసు కేసు కూడా నమోదైంది. ఇంతలో ఆ దొంగలో మానవత్వం పరిమళించినట్టుంది. తనను క్షమించాలని కోరుతూ ఓ లెటర్ రాసిపెట్టి మరీ, దొంగిలించిన టీకా వయల్స్ ను తిరిగి తెచ్చిచ్చాడు. బుధవారం రాత్రి ఆసుపత్రి స్టోర్ నుంచి టీకాలు దాచిన ఓ బాక్స్ పోయింది. ఇందులో 1,270 కొవీషీల్డ్, 440 కొవాగ్జిన్ వయల్స్ ఉన్నాయి. జరిగిన ఘటనపై ఆసుపత్రి అధికారులు పోలీసులకు ఫిర్యాదు చేశారు.

పోలీసులు విచారిస్తున్న క్రమంలో, గుర్తు తెలియని ఆ దొంగ, నిన్న మధ్యాహ్నం సివిల్ లైన్స్ పోలీసు స్టేషన్ సమీపంలో ఓ బ్యాగ్ ఉంచి వెళ్లాడని, డీసీపీ జితేంద్ర ఖట్కాడ్ వెల్లడించారు. ఆ బ్యాగ్ ను తెరచి చూడగా, వ్యాక్సిన్ తో పాటు, స్వయంగా రాసిన లేఖ కూడా ఒకటి ఉందని తెలిపారు. "నన్ను క్షమించండి. ఇందులో కరోనా వైరస్ వ్యాక్సిన్ ఉందన్న విషయం నాకు తెలియదు" అని రాసుంది.

ఇదిలావుండగా, ఈ వ్యాక్సిన్ వయల్స్ ఉంచిన స్టోర్ లోనే ఓ ల్యాప్ టాప్, రూ. 50 వేల వరకూ నగదు కూడా ఉందని వెల్లడించిన ఓ మెడికల్ ఆఫీసర్, సదరు దొంగ వీటి జోలికి పోలేదని తెలిపారు. ఈ కేసులో ఇంతవరకూ పోలీసులు ఎవరినీ అదుపులోకి తీసుకోలేదు. ఆ దొంగ ఎవరన్న విషయాన్ని గుర్తించేందుకు చర్యలు చేపట్టామని జితేంద్ర ఖట్కాడ్ తెలిపారు. హర్యానా రాష్ట్రంలో రోజువారీ కొత్త కేసుల సంఖ్య పాత రికార్డులను దాటేస్తుండటంతో అధికారులు, ప్రజలు ఆందోళన చెందుతున్నారు.