'హీరో' ట్రైలర్ లాంచ్ ఈవెంట్ కి డేట్ ఖరారు!

మహేశ్ బాబు మేనల్లుడు అశోక్ గల్లా 'హీరో' సినిమాతో హీరోగా తెలుగు తెరకి పరిచయమవుతున్నాడు. కృష్ణ పెద్ద కూతురు గల్లా పద్మావతి నిర్మించిన ఈ సినిమాకి, శ్రీరామ్ ఆదిత్య దర్శకత్వం వహించాడు. సంక్రాంతి కానుకగా ఈ సినిమాను ఈ నెల 15వ తేదీన విడుదల చేయనున్నారు. సెన్సార్ కార్యక్రమాలను పూర్తిచేసుకున్న ఈ సినిమా U/A సర్టిఫికెట్ తెచ్చుకుంది.

ప్రస్తుతం ఈ సినిమా ట్రైలర్ లాంచ్ ఈవెంట్ కి సన్నాహాలు జరుగుతున్నాయి. ట్రైలర్ లాంచ్ ఈవెంట్ ను ఈ నెల 9వ తేదీన తిరుపతిలోని 'నెహ్రూ మున్సిపల్ హై స్కూల్' గ్రౌండ్ లో నిర్వహించనున్నారు. ఆ రోజున సాయంత్రం 6 గంటల నుంచి ఈ వేడుక మొదలుకానుంది. అందుకు సంబందించిన పోస్టర్ ను కొంతసేపటి క్రితం విడుదల చేశారు.

అశోక్ జోడీగా నిధి అగర్వాల్ నటించిన ఈ సినిమాలో, జగపతిబాబు కీలకమైన పాత్రను పోషించారు. ఇతర ముఖ్యమైన పాత్రల్లో నరేశ్ .. వెన్నెల కిశోర్ .. సత్య .. బ్రహ్మాజీ కనిపించనున్నారు. గిబ్రాన్ సంగీతం ఈ సినిమాకి హైలైట్ గా నిలుస్తుందని భావిస్తున్నారు. సంక్రాంతి బరిలోకి దిగుతున్న ఈ సినిమా ఎలాంటి టాక్ ను సొంతం చేసుకుంటుందో చూడాలి.