రోడ్ల నిర్మాణంపై సీఎం జగన్ సమీక్ష... అభివృద్ధి పనులకు మోకాలడ్డుతున్నాయని విపక్షాలపై ఆగ్రహం

ఏపీలో రోడ్ల నిర్మాణం, మరమ్మతుల పనులపై సీఎం జగన్ నేడు సమీక్ష నిర్వహించారు. ఈ సందర్భంగా విపక్షాలపై మండిపడ్డారు. తాము అభివృద్ధి పనులు చేపడుతుంటే, విపక్షనేతలు ఆ పనులకు మోకాలడ్డుతున్నారని ఆరోపించారు. కేంద్రం నుంచి నిధులు రాకుండా చేసేందుకు కుట్రలు పన్నుతున్నారని, కేసుల సాయంతో అడ్డుకోవాలని చూస్తున్నారని ఆగ్రహం వ్యక్తం చేశారు. రాష్ట్ర ప్రభుత్వానికి రుణాలు లభించకుండా చేయాలని కంకణం కట్టుకున్నారని ఆవేదన వ్యక్తం చేశారు. 

ప్రతిపక్షాలు ఈ తరహా అజెండాతో పనిచేస్తున్నప్పటికీ, తాము ఎక్కడా మడమ తిప్పడంలేదని సీఎం జగన్ స్పష్టం చేశారు. అభివృద్ధి పనులకు నిధుల లోటు రాకుండా అన్ని చర్యలు తీసుకుంటున్నామని చెప్పారు. ప్రజలకు మేలు చేసే కార్యక్రమాలను ఎంత కష్టమైనా సరే పూర్తిచేస్తున్నామని ఉద్ఘాటించారు.