ప్రధాని మోదీకి ఫ్రాన్స్ అధ్యక్షుడు ఇమ్మాన్యుయేల్ మాక్రాన్ ఫోన్

జమ్మూకశ్మీర్‌లోని పహల్గామ్‌ లో జరిగిన ఉగ్రవాద దాడిపై ఫ్రాన్స్ అధ్యక్షుడు ఇమ్మాన్యుయేల్ మాక్రాన్ తీవ్ర దిగ్భ్రాంతి వ్యక్తం చేశారు. ఈ మేరకు భారత ప్రధాని నరేంద్ర మోదీకి శుక్రవారం ఆయన ఫోన్ చేసి మాట్లాడారు. అమాయక పౌరుల మృతికి దారితీసిన ఈ క్రూరమైన దాడి పట్ల తీవ్ర విచారం వ్యక్తం చేస్తూ, వ్యక్తిగత సంతాపం తెలియజేశారు.

ఈ కష్ట సమయంలో ఫ్రాన్స్ భారత్‌కు, భారత ప్రజలకు అండగా నిలుస్తుందని మాక్రాన్ హామీ ఇచ్చారు. మిత్రదేశాలతో కలిసి ఉగ్రవాదంపై తమ పోరాటాన్ని కొనసాగిస్తామని ఆయన స్పష్టం చేశారు. ఈ దాడి పూర్తిగా ఆమోదయోగ్యం కాని అనాగరిక చర్య అని ఆయన తీవ్రంగా ఖండించారు.

ఫ్రాన్స్ అధ్యక్షుడు అందించిన మద్దతుకు, సంఘీభావానికి ప్రధాని నరేంద్ర మోదీ కృతజ్ఞతలు తెలిపారు. ఈ దారుణానికి పాల్పడిన వారిని చట్టం ముందు నిలబెట్టాలనే భారత్ బలమైన సంకల్పాన్ని ఆయన మాక్రాన్‌కు తెలియజేశారు.

మంగళవారం అనంత్‌నాగ్ జిల్లాలోని బైసరన్ ప్రాంతంలో జరిగిన ఈ ఉగ్రదాడిలో పలువురు అమాయక పౌరులు మరణించిన విషయం తెలిసిందే. ఈ ఘటనపై అంతర్జాతీయంగా పలు దేశాలు తీవ్రంగా స్పందించి, భారత్‌కు తమ మద్దతు ప్రకటించాయి.