మే 13 నుంచి బీజేపీ తిరంగా యాత్ర

భారత సైన్యం పాకిస్థాన్ ఉగ్ర స్థావరాలపై చేపట్టిన 'ఆపరేషన్ సిందూర్' విజయవంతమైన నేపథ్యంలో, బీజేపీ కీలక నిర్ణయం తీసుకుంది. ఈ విజయాన్ని పురస్కరించుకుని దేశవ్యాప్తంగా 'తిరంగా యాత్ర' పేరుతో భారీ ప్రచార కార్యక్రమాన్ని నిర్వహించాలని నిర్ణయించింది. మే 13న ప్రారంభం కానున్న ఈ యాత్ర, 11 రోజుల పాటు అంటే మే 23 వరకు కొనసాగుతుందని పార్టీ వర్గాలు తెలిపాయి.

ప్రధానమంత్రి నరేంద్ర మోదీ నాయకత్వ పటిమతో పాటు, భారత సాయుధ బలగాల ధైర్యసాహసాలను, పరాక్రమాన్ని ప్రజల్లోకి బలంగా తీసుకెళ్లడమే ఈ 'తిరంగా యాత్ర' యొక్క ముఖ్య ఉద్దేశమని బీజేపీ నేతలు పేర్కొన్నారు.

ఈ యాత్ర నిర్వహణ, ప్రణాళికపై చర్చించేందుకు బీజేపీ అగ్రనాయకత్వం వరుస సమావేశాలు నిర్వహించింది. ఆదివారం కేంద్ర హోంమంత్రి అమిత్ షా, రక్షణ మంత్రి రాజ్‌నాథ్ సింగ్‌లతో పాటు పార్టీ జాతీయ అధ్యక్షుడు జేపీ నడ్డా సమావేశమయ్యారు. అనంతరం సోమవారం నాడు నడ్డా.. పార్టీ నేతలు తరుణ్ చుగ్, వినోద్ తావ్డే, దుశ్యంత్ గౌతమ్‌లతో మరోసారి సమావేశమై యాత్రకు సంబంధించిన తుది ప్రణాళికను ఖరారు చేశారు.

దేశవ్యాప్తంగా జరగనున్న ఈ 'తిరంగా యాత్ర'లో సమాజంలోని పలువురు ప్రముఖులతో పాటు, పెద్ద ఎత్తున ప్రజలను భాగస్వాములను చేయాలని బీజేపీ భావిస్తోంది. కేంద్ర మంత్రులు, పార్టీ ముఖ్య నేతలు, ఎంపీలు, ఎమ్మెల్యేలు, స్థానిక నాయకులు, కార్యకర్తలు ఈ యాత్రలో చురుగ్గా పాల్గొంటారని పార్టీ వర్గాలు వెల్లడించాయి.