తిరుమలలో ఆర్టీసీ డ్రైవర్ పై కానిస్టేబుల్ దాడి... వీడియో ఇదిగో!

తిరుమల పుణ్యక్షేత్రంలో ఓ అనూహ్య సంఘటన చోటుచేసుకుంది. విధి నిర్వహణలో ఉన్న ఆర్టీసీ బస్సు డ్రైవర్‌పై ఓ పోలీసు కానిస్టేబుల్ దాడికి పాల్పడిన ఉదంతం స్థానికంగా కలకలం రేపింది. ఈ ఘటన మంగళవారం రాత్రి తిరుమలలోని మాధవం గెస్ట్ హౌస్ సమీపంలో జరిగినట్లు తెలిసింది.

వివరాల్లోకి వెళితే, అలిపిరి డిపోకు చెందిన ఎలక్ట్రికల్ ఏసీ బస్సు డ్రైవర్ అన్వేష్ రెడ్డి, మంగళవారం రాత్రి ప్రయాణికులను గమ్యస్థానాలకు చేరవేసే విధుల్ల ఉన్నారు. ఈ క్రమంలో ఆయన మాధవం గెస్ట్ హౌస్ ఎదురుగా బస్సును నిలిపి ఉంచారు. ఆ సమయంలో అక్కడికి వచ్చిన బాంబ్ స్క్వాడ్‌కు చెందిన ఓ కానిస్టేబుల్, డ్రైవర్ అన్వేష్ రెడ్డితో వాగ్వాదానికి దిగి, అనంతరం దాడి చేశాడు. ఈ దాడి దృశ్యాలు బస్సులో అమర్చిన సీసీటీవీ కెమెరాల్లో స్పష్టంగా రికార్డయ్యాయి.

ఈ ఘటనపై ఆర్టీసీ డ్రైవర్లు, కార్మిక సంఘాల నాయకులు తీవ్ర ఆగ్రహం వ్యక్తం చేశారు. డ్యూటీలో ఉన్న తమ సిబ్బందిపై దాడి జరగడాన్ని తీవ్రంగా ఖండించారు. బాధితుడైన డ్రైవర్ అన్వేష్ రెడ్డి, ఇతర డ్రైవర్లు మరియు ఆర్టీసీ యూనియన్ నాయకులతో కలిసి వెంటనే ఈ విషయాన్ని ఆర్టీసీ ఉన్నతాధికారుల దృష్టికి తీసుకెళ్లారు. అనంతరం, వారు తిరుమల టూ టౌన్ పోలీస్ స్టేషన్‌లో బాధ్యుడైన బాంబ్ స్క్వాడ్ కానిస్టేబుల్ పై అధికారికంగా ఫిర్యాదు చేశారు. పోలీసులు కేసు నమోదు చేసుకుని దర్యాప్తు చేస్తున్నట్లు తెలిసింది. ఈ ఘటనకు సంబంధించిన సీసీటీవీ ఫుటేజీని కూడా పోలీసులకు అందజేసినట్లు సమాచారం.