నాన్నకు టెస్ట్ క్రికెట్ అంటే ప్రాణం.. నా రిటైర్మెంట్ నిర్ణయం ఆయన్ను బాధపెట్టింది: రోహిత్

టీమిండియా స్టార్ ఓపెనర్ రోహిత్ శర్మ తన టెస్ట్ క్రికెట్ రిటైర్మెంట్‌పై తొలిసారి పెదవి విప్పాడు. ఈ విషయంలో తన తండ్రి గురునాథ్ శర్మ తీవ్ర నిరాశకు గురయ్యారని, ఆయనకు టెస్ట్ క్రికెట్ అంటే అమితమైన ఇష్టమని పేర్కొన్నాడు. భారత టెస్ట్ స్పెషలిస్ట్ బ్యాటర్ ఛతేశ్వర్ పుజారా భార్య పూజా పుజారా రచించిన 'ది డైరీ ఆఫ్ ఏ క్రికెటర్స్ వైఫ్' పుస్తకావిష్కరణ కార్యక్రమం నిన్న ముంబైలో జరిగింది. ఈ కార్యక్రమంలో పాల్గొన్న రోహిత్ మాట్లాడుతూ ఈ వ్యాఖ్యలు చేశాడు. 

తన క్రికెట్ ప్రస్థానంలో తన తండ్రి పోషించిన పాత్రను గుర్తుచేసుకుంటూ.. ఆయనకు సంప్రదాయ క్రికెట్ పట్ల ఉన్న మక్కువను రోహిత్ వివరించాడు. "మా నాన్న ఒక రవాణా సంస్థలో పనిచేసేవారు. మా జీవితం కోసం అమ్మతోపాటు ఆయన కూడా ఎన్నో త్యాగాలు చేశారు. ఆయనకు మొదటి నుంచి టెస్ట్ క్రికెట్ అంటే పిచ్చి. ఈ తరం ఆధునిక క్రికెట్ అంటే ఆయనకు అంతగా నచ్చదు" అని రోహిత్ పేర్కొన్నాడు.

వన్డేల్లో తాను రికార్డు స్థాయిలో 264 పరుగులు చేసినప్పటికీ తన తండ్రి నుంచి పెద్దగా ప్రశంసలు రాలేదని, కానీ టెస్టుల్లో 30, 40 పరుగులు చేసినా ఎంతో సంతోషించేవారని రోహిత్ గుర్తుచేసుకున్నాడు. "నేను వన్డేల్లో 264 పరుగులు చేసిన రోజు నాకు ఇంకా గుర్తుంది. అప్పుడు ఆయన 'సరే, బాగా ఆడావు, మంచిది' అన్నారు అంతే. ఆయనలో ఏమాత్రం ఉత్సాహం కనిపించలేదు. కానీ నేను టెస్ట్ క్రికెట్‌లో 30, 40 పరుగులు లేదా 50, 60 పరుగులు చేసినప్పుడు దాని గురించి నాతో వివరంగా మాట్లాడేవారు. ఆట పట్ల ఆయనకున్న ప్రేమ అలాంటిది" అని రోహిత్ గుర్తుచేసుకున్నాడు.

పాఠశాల స్థాయి క్రికెట్ నుంచి అండర్-19, రంజీ ట్రోఫీ, దులీప్ ట్రోఫీ, ఇరానీ ట్రోఫీ, ఇండియా-ఏ వరకు తన ప్రయాణాన్ని నాన్న చూశారని రోహిత్ పేర్కొన్నాడు. "నేను రెడ్‌బాల్ క్రికెట్ ఎక్కువగా ఆడటం మా నాన్న చూశారు. అందుకే ఆయన రెడ్‌బాల్ క్రికెట్‌ను ఎంతగానో ఆస్వాదిస్తారు. నేను టెస్టుల నుంచి రిటైర్మెంట్ ప్రకటించినప్పుడు ఆయన కొంచెం నిరాశ చెందారు. కానీ అదే సమయంలో సంతోషంగా కూడా ఉన్నారు. ఏదేమైనా, అది మా నాన్న. ఈ రోజు నేను ఈ స్థాయిలో ఉన్నానంటే అందుకు వారి సాయం ఎంతో ఉంది. వారి మద్దతు లేకపోతే ఇది సాధ్యమయ్యేది కాదు" అని రోహిత్ అన్నాడు.