పల్లా శ్రీనివాసరావును పరామర్శించిన మంత్రి నారా లోకేశ్

ఆంధ్రప్రదేశ్ రాష్ట్ర ఐటీ, మానవ వనరుల అభివృద్ధి శాఖ మంత్రి నారా లోకేశ్ మంగళవారం విశాఖపట్నంలో పర్యటించారు. ఈ సందర్భంగా, ఇటీవల కన్నుమూసిన మాజీ శాసనసభ్యుడు, టీడీపీ రాష్ట్ర అధ్యక్షుడు పల్లా శ్రీనివాసరావు తండ్రి పల్లా సింహాచలం చిత్రపటానికి ఆయన నివాళులర్పించారు.

వివరాల్లోకి వెళితే, మంత్రి నారా లోకేశ్ నేరుగా విశాఖ సీతంపేటలోని పల్లా శ్రీనివాసరావు నివాసానికి వెళ్లారు. అక్కడ పల్లా సింహాచలం చిత్రపటానికి పూలమాల వేసి శ్రద్ధాంజలి ఘటించారు. అనంతరం పల్లా శ్రీనివాసరావు, ఇతర కుటుంబ సభ్యులను పరామర్శించి, తన ప్రగాఢ సానుభూతిని తెలియజేశారు.

దీనిపై మంత్రి లోకేశ్ సోషల్ మీడియాలో స్పందించారు. పల్లా సింహాచలం గారు మంచికి మారుపేరుగా నిలిచారని కొనియాడారు. విశాఖ-2 నియోజకవర్గ శాసనసభ్యుడిగా ఆయన నియోజకవర్గ అభివృద్ధికి ఎంతో కృషి చేశారని, ఆయన సేవలను ఈ సందర్భంగా గుర్తు చేసుకుంటున్నానని తెలిపారు. పల్లా సింహాచలం గారి మృతి పట్ల తాను తీవ్ర విచారం వ్యక్తం చేస్తున్నట్లు పేర్కొన్నారు. ఈ మేరకు సోషల్ మీడియాలో ఫొటోలను పంచుకున్నారు.