ప్రియాంక చోప్రా 2.0 హెయిర్ స్టయిల్ గుట్టు తెలిసింది!

గ్లోబల్ స్టార్ ప్రియాంక చోప్రా తన కొత్త హెయిర్ స్టైల్ వెనుక ఉన్న అసలు రహస్యాన్ని బయటపెట్టారు. ప్రముఖ హెయిర్ స్టైలిస్టులు ఎంతమంది ఉన్నా, తనకు అసలైన స్టైలిస్ట్ తన భర్త నిక్ జొనాస్ అని ఆమె పరోక్షంగా చెప్పేశారు. తాజాగా తన ఇన్‌స్టాగ్రామ్‌లో పోస్ట్ చేసిన ఓ అందమైన వీడియో ఇప్పుడు సోషల్ మీడియాలో వైరల్ అవుతోంది.

ఈ వీడియోలో ప్రియాంక ఒక డ్రెస్సింగ్ చైర్‌లో కూర్చొని ఉండగా, ఆమె భర్త, ప్రముఖ పాప్ సింగర్ నిక్ జొనాస్ ఆమె పోనీటెయిల్‌ను ఎంతో శ్రద్ధగా సరిచేయడం కనిపిస్తుంది. నిజానికి, 'హెడ్స్ ఆఫ్ స్టేట్' షూటింగ్ కోసం ప్రముఖ హెయిర్ స్టైలిస్ట్ థిబౌడ్ సల్డూచీ ఆమెకు హై పోనీటెయిల్ వేశారు. అయితే దానికి తుది మెరుగులు దిద్దే బాధ్యతను నిక్ తీసుకున్నారు.

ఈ క్యూట్ మూమెంట్‌ను ప్రియాంక తన ఫోన్‌లో సెల్ఫీ వీడియో తీస్తూ, "మళ్లీ మొదలైంది.. నిక్ తన పనిలో ఉన్నాడు. ఇదంతా పూర్తయ్యేసరికి రేపటివరకు పడుతుందేమో!" అంటూ సరదాగా వ్యాఖ్యానించారు. ఈ వీడియోకు ఆమె ఒక ఆసక్తికరమైన క్యాప్షన్ కూడా జోడించారు. "నా జుట్టు అలాగే ఉండాలనుకుంటోంది.. కానీ నిక్ వద్దన్నాడు! 'పోనీటెయిల్‌తో చిక్కులు 2.0'..." అని పేర్కొంటూ, తన ప్రొఫెషనల్ హెయిర్ స్టైలిస్ట్‌కు ధన్యవాదాలు తెలిపారు. ఈ పోస్ట్ చూసిన అభిమానులు ఈ జంట అన్యోన్యతకు మురిసిపోతూ కామెంట్లు పెడుతున్నారు.