భారతీయ అలవాట్లకు రష్యన్ కోడలు ఫిదా!

భారతీయ సంప్రదాయాలు, కుటుంబ వ్యవస్థపై భిన్నాభిప్రాయాలు వ్యక్తమవుతున్న తరుణంలో, రష్యాకు చెందిన ఓ మహిళ మన జీవనశైలిపై ప్రశంసల వర్షం కురిపిస్తున్నారు. భారతీయుడిని వివాహం చేసుకుని బెంగళూరులో స్థిరపడిన యూలియా అనే కంటెంట్ క్రియేటర్, తనకు అలవాటైన కొన్ని భారతీయ పద్ధతుల గురించి పంచుకున్న వీడియో ఇప్పుడు సోషల్ మీడియాలో సంచలనం సృష్టిస్తోంది. విదేశీయులకు వింతగా, ఇబ్బందికరంగా అనిపించే ఎన్నో విషయాలు తనకు ఇప్పుడు ఎంతో సౌకర్యాన్ని, ఆనందాన్ని ఇస్తున్నాయని ఆమె పేర్కొన్నారు.

సుమారు 11 సంవత్సరాల క్రితం రష్యాలో ఉద్యోగాన్ని వదిలిపెట్టి భారత్‌కు వచ్చిన యూలియా, ఇక్కడే తన కుటుంబాన్ని నిర్మించుకోవడమే కాకుండా సొంతంగా వ్యాపారం కూడా ప్రారంభించారు. ఇటీవల ఆమె తన ఇన్‌స్టాగ్రామ్‌లో పంచుకున్న వీడియోలో, తాను ఇప్పుడు సాధారణంగా భావించే 8 భారతీయ అలవాట్లను వివరించారు. ఈ జాబితాలో ఆమె చెప్పిన మొదటి విషయమే అందరినీ ఆకట్టుకుంటోంది. "అత్తమామలతో కలిసి జీవించడం ఒక వరం" అని ఆమె చెప్పడం విశేషం. మొదట్లో ఇది తనకు వింతగా అనిపించినా, ఇప్పుడు ఆ బంధాన్ని ఎంతో ఆస్వాదిస్తున్నానని తెలిపారు.

యూలియా చెప్పిన 8 భారతీయ అలవాట్లు ఇవే...

1. అత్తమామలతో కలిసి ఉండటం: ఇది దేవుడిచ్చిన వరమని ఆమె అభిప్రాయపడ్డారు.
2. చేతులతో తినడం: చాలాసార్లు చేతితో తింటేనే భోజనం మరింత రుచిగా ఉంటుందని అన్నారు.
3. కొద్దిగా ఆలస్యం: సమావేశాలకు 15-20 నిమిషాలు ఆలస్యంగా రావడం ఇక్కడ సాధారణమని, దానికి తగ్గట్టుగానే తాను ప్రణాళికలు వేసుకుంటానని నవ్వుతూ చెప్పారు.
4. పని మనుషులు: ప్రతి పనికి ఇంట్లో సహాయకులు ఉండటాన్ని ప్రస్తావించారు.
5. బహుభాషలు: ఒకేసారి కొన్ని భాషలు మాట్లాడటం, ముఖ్యంగా హిందీ-ఇంగ్లీష్ కలిపి మాట్లాడే ‘హింగ్లిష్’ను తాను అర్థం చేసుకోగలనని తెలిపారు.
6. బేరసారాలు: దాదాపు ప్రతి వస్తువుకు బేరమాడటం ఇక్కడ సర్వసాధారణమని, దీనివల్ల తాను వ్యాపారం, కమ్యూనికేషన్ నైపుణ్యాలను బాగా నేర్చుకున్నానని వివరించారు.
7. చాయ్ తాగడం: ఇక్కడ టీని పాలు, సుగంధ ద్రవ్యాలతో కలిపి తాగడం నాకు బాగా నచ్చింది.. నేను మంగోలియా సరిహద్దులో పుట్టాను! ఏమండీ, మీరు కూడా మంగోలియన్ హార్డ్‌కోర్ మసాలా చాయ్ ప్రయత్నించాలి. 
8. ప్రేమకు అంకితం: భారతదేశంలో ప్రతీది ప్రేమతోనే ముడిపడి ఉంటుందని, సినిమాలు, సమస్యలు అన్నీ ప్రేమ చుట్టూనే తిరుగుతాయని ఆమె పేర్కొన్నారు.

ఈ వీడియోకు సోషల్ మీడియాలో అనూహ్య స్పందన లభించింది. ఇప్పటివరకు దాదాపు 60 లక్షల మంది దీనిని వీక్షించారు. నెటిజన్లు యూలియా అభిప్రాయాలతో ఏకీభవిస్తూ కామెంట్లు పెడుతున్నారు. "మీరు చెప్పినవన్నీ బాగున్నాయి. నేను ఇండియాను, నా కుటుంబాన్ని చాలా మిస్ అవుతున్నాను" అని ఒకరు వ్యాఖ్యానించగా, "భారతదేశం అంటే ప్రేమ అని ప్రపంచానికి అర్థమయ్యేలా చెప్పినందుకు ధన్యవాదాలు" అని మరొకరు ప్రశంసించారు. అయితే, "అత్తమామలతో కలిసి ఉండటం అనేది దంపతుల వ్యక్తిగత ఇష్టం" అని కొందరు భిన్నమైన అభిప్రాయాన్ని కూడా వ్యక్తం చేశారు. ఏదేమైనా, ఒక విదేశీ మహిళ భారతీయ సంస్కృతిని ఇంతగా అర్థం చేసుకుని, ప్రేమగా స్వీకరించడంపై ఎక్కువ మంది హర్షం వ్యక్తం చేస్తున్నారు.