రికార్డులు బద్దలు కొడుతున్న గిల్... 'స్టార్ బాయ్' అంటూ కోహ్లీ ప్రశంసలు!

భారత టెస్ట్ జట్టు నూతన కెప్టెన్ శుభ్‌మన్ గిల్ తన అద్భుతమైన ఫామ్‌ను కొనసాగిస్తున్నాడు. తన రికార్డులను తానే బద్దలు కొడుతున్న ఈ యువ కెరటంపై మాజీ కెప్టెన్ విరాట్ కోహ్లీ ప్రశంసల వర్షం కురిపించారు. ఇంగ్లండ్‌తో ఎడ్జ్‌బాస్టన్‌లో జరుగుతున్న రెండో టెస్టు రెండో ఇన్నింగ్స్‌లో గిల్ (161) అద్వితీయమైన శతకంతో కదం తొక్కాడు. ఈ అద్భుత ప్రదర్శనపై కోహ్లీ స్పందిస్తూ గిల్‌ను ‘స్టార్ బాయ్’ అని అభివర్ణించాడు.

గిల్ అద్భుత బ్యాటింగ్‌పై విరాట్ కోహ్లీ తన ఇన్‌స్టాగ్రామ్ స్టోరీలో స్పందించాడు. "అద్భుతంగా ఆడావు స్టార్ బాయ్. చరిత్రను తిరగరాస్తున్నావు. ఇకపై నీకు అంతా మంచే జరగాలి. నువ్వు దీనికి పూర్తిగా అర్హుడివి" అని పోస్ట్ చేశాడు. కోహ్లీ టెస్ట్ క్రికెట్ నుంచి రిటైర్ అయినప్పటికీ, తన వారసుడి ప్రదర్శనను అభినందించడం క్రీడా వర్గాల్లో ఆసక్తిని రేపింది.

ఈ మ్యాచ్ మొదటి ఇన్నింగ్స్‌లో గిల్ 269 పరుగులు చేసి ఒక టెస్ట్ ఇన్నింగ్స్‌లో అత్యధిక పరుగులు చేసిన భారత కెప్టెన్‌గా కోహ్లీ రికార్డును బద్దలు కొట్టాడు. తాజాగా రెండో ఇన్నింగ్స్‌లో 161 పరుగులు చేయడం ద్వారా కెప్టెన్‌గా అరంగేట్రం చేసిన సిరీస్‌లోనే అత్యధిక పరుగులు చేసిన భారత ఆటగాడిగా కోహ్లీ పేరిట ఉన్న మరో రికార్డును కూడా గిల్ అధిగమించాడు.

ఈ సిరీస్‌లో రెండు టెస్టుల్లోనే గిల్ మొత్తం 585 పరుగులు సాధించి, అత్యధిక పరుగుల వీరుడిగా అగ్రస్థానంలో నిలిచాడు. సిరీస్ ప్రారంభానికి ముందు కోహ్లీ లండన్‌లోని తన నివాసంలో గిల్, రిషబ్ పంత్ వంటి యువ ఆటగాళ్లకు విందు ఇవ్వడం గమనార్హం. గతంలో ఐపీఎల్ 2023లో గిల్ సెంచరీ చేసినప్పుడు కూడా ‘తర్వాతి తరానికి నాయకత్వం వహించు’ అంటూ కోహ్లీ అభినందించిన విషయం తెలిసిందే.