vijay devarakonda: అరుదైన రికార్డును సొంతం చేసుకున్న 'గీత గోవిందం'

06-09-2018 Thu 14:16 | Entertainment

కొనసాగుతోన్న 'గీత గోవిందం' జోరు
402 థియేటర్లలో 25 రోజులు పూర్తి
50 రోజుల మైలురాయిని చేరుతుందని అంచనా

విజయ్ దేవరకొండ .. రష్మిక మందన జంటగా పరశురామ్ దర్శకత్వంలో తెరకెక్కిన 'గీత గోవిందం' సంచలన విజయాన్ని సాధించింది. 'గీతా ఆర్ట్స్ 2' బ్యానర్లో రూపొందిన ఈ సినిమా, 12 రోజుల్లోనే 100 కోట్ల క్లబ్ లోకి చేరిపోయింది. విడుదలైన ప్రతి ప్రాంతంలో ఈ సినిమా తన జోరును కొనసాగిస్తూ 25 రోజులను పూర్తి చేసుకుంది.

25 రోజులను పూర్తి చేసుకోవడం గొప్ప విషయమేమీ కాదు .. కానీ 402 థియేటర్లలో ఈ సినిమా 25 రోజులను పూర్తి చేసుకోవడమే చెప్పుకోదగిన విషయం. తెలుగు రాష్ట్రాల్లో 302 థియేటర్స్ లో ఈ సినిమా 25 రోజులను పూర్తి చేసుకోగా, మిగతా ప్రాంతాల్లోని థియేటర్స్ ను కలుపుకోగా ఆ సంఖ్య 402కి చేరుకుంది. ఇప్పటికీ ఈ సినిమా వసూళ్లపై కొత్త సినిమాల ప్రభావం అంతగా లేకపోవడంతో, 50 రోజుల మైలురాయిని కూడా ఈ సినిమా చాలా తేలికగా దాట గలదనే అభిప్రాయాలు వ్యక్తమవుతున్నాయి.