dil raju: వరుస ఫ్లాపులతో వున్న రాజ్ తరుణ్ మంచి ఛాన్స్ కొట్టేశాడు
- ఈ మధ్య కాలంలో హిట్ లేని రాజ్ తరుణ్
- దిల్ రాజు బ్యానర్లో అవకాశం
- త్వరలోనే సెట్స్ పైకి
ఈ మధ్య కాలంలో రాజ్ తరుణ్ ను ఒక్క హిట్టూ పలకరించలేదు. 'అంధగాడు' .. 'రాజుగాడు' .. 'లవర్' చిత్రాలు వరుస పరాజయాలను అందుకున్నాయి. దాంతో ఆయనకి అవకాశాలు తగ్గుతూ వస్తున్నాయి. ఈ నేపథ్యంలో ఆయనకి దిల్ రాజు బ్యానర్లో చేసే ఛాన్స్ దొరకడం విశేషం. దర్శకుడు కృష్ణారెడ్డి వినిపించిన ఒక కథ నచ్చడంతో, ఆ కథను తెరపైకి తీసుకురావడానికి దిల్ రాజు రంగంలోకి దిగారు.
గతంలో ఈ దర్శకుడి నుంచి 'ఆడు మగాడ్రా బుజ్జీ' సినిమా వచ్చింది. ఇప్పుడు దిల్ రాజు నిర్మాతగా ఈ దర్శకుడు రూపొందించనున్న సినిమాలో రాజ్ తరుణ్ ని కథానాయకుడిగా తీసుకున్నట్టుగా తెలుస్తోంది. ఇంతకుముందు ఈ దర్శకుడితో గల్లా జయదేవ్ తనయుడు హీరోగా ఒక సినిమా చేయాలని దిల్ రాజు అనుకున్నారు. ఇటీవలే ఆయన ఆ ఆలోచనను విరమించుకున్నట్టుగా వార్తలు వచ్చాయి. అదే కథను ఇప్పుడు రాజ్ తరుణ్ హీరోగా చేస్తున్నట్టుగా ఫిల్మ్ నగర్లో ఒక వార్త షికారు చేస్తోంది.
