Chiranjeevi: 9 నుంచి చిరంజీవి 'ఆచార్య' షూటింగ్.. నెల రోజుల భారీ షెడ్యూల్!
- చిరంజీవి, కొరటాల కాంబోలో 'ఆచార్య'
- తాజా షెడ్యూలుతో చాలా వరకు పూర్తి
- వేసవిలో సినిమా విడుదలకు సిద్ధం
- ప్రకటించిన కొణిదెల ప్రొడక్షన్ కంపెనీ
లాక్ డౌన్ కారణంగా గత ఏడు నెలలుగా షూటింగుకి అంతరాయం కలిగిన సినిమాలలో చిరంజీవి నటిస్తున్న 'ఆచార్య' కూడా వుంది. లాక్ డౌన్ కి ముందు ఈ చిత్రానికి సంబంధించిన కొంత షూటింగ్ హైదరాబాదులో జరిగింది. ఇప్పుడు మళ్లీ టాలీవుడ్ లో షూటింగులు మొదలవుతున్న నేపథ్యంలో 'ఆచార్య' చిత్రం షూటింగును కూడా ప్రారంభిస్తున్నారు.
ఈ నెల 9 నుంచి ఈ చిత్రం షూటింగ్ తిరిగి మొదలవుతుందని కొణిదెల ప్రొడక్షన్ కంపెనీ సోషల్ మీడియాలో ఈ రోజు వెల్లడించింది. లాక్ డౌన్ అనంతరం, పక్కాగా రక్షణ చర్యలు తీసుకుని, ఈ నెల 9 నుంచి తిరిగి షూటింగును నిర్వహించడానికి ఉత్తేజభరితంగా ఉన్నామని సదరు సంస్థ ప్రకటించింది. ఇది నెల రోజుల భారీ షెడ్యూలనీ, ఇందులో చాలా భాగం చిత్రీకరణ పూర్తవుతుందని పేర్కొన్నారు. అలాగే ఈ చిత్రం వచ్చే ఏడాది వేసవిలో థియేటర్లో సందడి చేస్తుందని విడుదల విషయాన్ని కూడా ప్రకటించారు.
కొరటాల శివ దర్శకత్వంలో రూపొందుతున్న ఈ చిత్రంలో చిరంజీవి సరసన కాజల్ అగర్వాల్ కథానాయికగా నటిస్తోంది. అలాగే రామ్ చరణ్ ఓ కీలక పాత్రలో గెస్ట్ గా నటిస్తున్నాడు. గతంలో చిరంజీవికి పలు సినిమాలలో హిట్ మ్యూజిక్ ఇచ్చిన మణిశర్మ దీనికి సంగీతాన్ని అందిస్తున్నారు. రామ్ చరణ్, నిరంజన్ రెడ్డి కలసి సంయుక్తంగా ఈ చిత్రాన్ని నిర్మిస్తున్నారు.