Tamannaah: తమన్నా వెబ్ సీరీస్ టైటిల్ 'ఎలెవెంత్ అవర్'.. పోస్టర్ విడుదల
- 'ఆహా' ఓటీటీ కోసం తమన్నా వెబ్ సీరీస్
- 'గరుడ వేగ' ఫేమ్ ప్రవీణ్ సత్తారు దర్శకత్వం
- త్వరలోనే వెబ్ సీరీస్ స్ట్రీమింగ్
కరోనా లాక్ డౌన్ సమయంలో థియేటర్లకు ప్రత్యామ్నాయంగా నిలిచిన ఓటీటీ ప్లేయర్స్ కు జై కొడుతున్న కథానాయికల్లో తమన్నా కూడా చేరింది. అటు సినిమాలతో పాటు, ఇటు ఓటీటీ వేదికలకు వెబ్ సీరీస్ చేయడానికి కూడా ఈ ముద్దుగుమ్మ ముందుకు వచ్చింది. ఈ క్రమంలో తాజాగా 'ఆహా' ఓటీటీ ప్లేయర్ కోసం ఓ వెబ్ సీరీస్ చేస్తోంది.
ఆమధ్య రాజశేఖర్ తో 'గరుడ వేగ' వంటి యాక్షన్ చిత్రాన్ని చేసిన ప్రముఖ దర్శకుడు ప్రవీణ్ సత్తారు దీనికి దర్శకత్వం వహిస్తున్నారు. కాగా ప్రదీప్ యు. నిర్మిస్తున్న ఈ వెబ్ సీరీస్ కి 'ఎలెవెంత్ అవర్' (11th HOUR) అనే టైటిల్ని ఖరారు చేశారు. దీనికి సంబంధించిన టైటిల్ పోస్టర్ని ఈ రోజు విడుదల చేశారు. త్వరలోనే దీని స్ట్రీమింగ్ మొదలవుతుంది.
ఇదిలావుంచితే, ఇటీవల కరోనా బారిన పడిన తమన్నా ఇప్పుడు పూర్తిగా కోలుకుని మళ్లీ షూటింగులకు హాజరవుతోంది. మరోపక్క కొత్త సినిమాలకు కథలను కూడా వింటోంది.