Kalyan Krishna: నిర్మాతగా మారుతున్న మరో దర్శకుడు
- 'సోగ్గాడే చిన్ని నాయనా'తో దర్శకుడిగా పేరు
- ఓటీటీ కోసం చిన్న బడ్జెట్ చిత్రనిర్మాణం
- దీని ద్వారా నూతన దర్శకుడి పరిచయం
- 'బంగార్రాజు'కి దర్శకత్వం వహించనున్న కల్యాణ్
ఇటీవలి కాలంలో మన దర్శకులలో చాలామంది నిర్మాతలుగా కూడా మారుతుండడాన్ని మనం చూస్తూనే వున్నాం. ఒకటి, రెండు సినిమాలు చేసిన దర్శకులు కూడా నిర్మాతలుగా సొంత బ్యానర్లు నెలకొల్పి, చిన్న చిత్రాల నిర్మాణం చేస్తున్నారు. ఆ బ్యానర్లపై నిర్మించే చిత్రాలకు కొత్త దర్శకులకు అవకాశాలు ఇస్తున్నారు. అదే కోవలో టాలీవుడ్ లో మరో దర్శకుడు కూడా నిర్మాతగా మారుతున్నాడు.
ఆమధ్య అక్కినేని నాగార్జునతో 'సోగ్గాడే చిన్ని నాయనా' వంటి హిట్ చిత్రాన్ని రూపొందించిన దర్శకుడు కల్యాణ్ కృష్ణ ఇప్పుడు ఓ చిత్రాన్ని నిర్మించడానికి రెడీ అవుతున్నారు. ప్రస్తుతం వేగంగా దూసుకుపోతున్న ఓటీటీ మాధ్యమం కోసం ఆయన ఈ చిన్న బడ్జెట్ చిత్రాన్ని ప్లాన్ చేస్తున్నట్టు తెలుస్తోంది. ఈ చిత్రం ద్వారా తన మిత్రుడు నవీన్ గాంధీని ఆయన దర్శకుడిగా పరిచయం చేస్తున్నాడట.
ఇదిలావుంచితే, మరోపక్క 'సోగ్గాడే చిన్ని నాయనా' చిత్రానికి సీక్వెల్ చేసే ప్రయత్నాలను కల్యాణ్ కృష్ణ గతకొంతకాలంగా చేస్తున్నాడు. ఆ సినిమాలోని బంగార్రాజు పాత్రను ప్రధానంగా తీసుకుని 'బంగార్రాజు' టైటిల్ తో దీనికి కథను కూడా సిద్ధం చేశారు. ఇక నాగార్జున గ్రీన్ సిగ్నల్ ఇవ్వడాన్ని బట్టి ఈ ప్రాజక్టు ముందుకు వెళుతుంది.