Nayanthara: హైదరాబాదులో నయనతార, విఘ్నేశ్ జంట!
- హైదరాబాదులో రజనీ, నయన్ ల చిత్రం షూటింగ్
- ఇక్కడే షూటింగ్ జరుపుకుంటున్న విఘ్నేశ్ చిత్రం
- కరోనా కండిషన్లతో కలవలేకపోతున్న నయన్, విఘ్నేశ్
దక్షిణాది అగ్రనటి నయనతార తమిళ దర్శకుడు విఘ్నేశ్ శివన్ ప్రేమలో మునిగి తేలుతున్న సంగతి తెలిసిందే. తమ ప్రేమ గురించి వారు బహిరంగంగానే వెల్లడించారు. ఇద్దరు కలసి విహార యాత్రలకు కూడా వెళ్లారు. కలిసి దిగిన ఎన్నో ఫొటోలను సోషల్ మీడియాలో పంచుకున్నారు. తాజాగా తమ చిత్రాల షూటింగుల కోసం వీరిద్దరూ హైదరాబాదుకు వచ్చారు. ఇద్దరూ హైదరాబాదులోనే ఉంటున్నప్పటికీ కలుసుకోవడం మాత్రం కుదరడం లేదట.
వీరిద్దరూ కలవకపోవడానికి సూపర్ స్టార్ రజనీకాంత్ సినిమానే కారణమట. రజనీ తాజా చిత్రం 'అన్నాత్తే' షూటింగ్ హైదరాబాదులో జరుగుతోంది. ఈ చిత్రంలో రజనీ సరసన నయనతార నటిస్తోంది. విఘ్నేశ్ తెరకెక్కిస్తున్న 'కాదు వాకుల రెండు కదల్' సినిమా షూటింగ్ కూడా హైదరాబాదులోనే జరుగుతోంది. అయితే, కరోనా భయాలతో చిత్ర యూనిట్ ఎవరూ బయట వారిని కలవకూడదని నిబంధన విధించారట. దీంతో, ఈ ప్రేమ పక్షులు ఒకే చోట ఉన్నప్పటికీ విడివిడిగానే ఉంటున్నారట.