Ramulu Nayak: తెలంగాణ పట్టభద్రుల ఎమ్మెల్సీ కాంగ్రెస్ అభ్యర్థులుగా రాములు నాయక్, చిన్నారెడ్డి ఖరారు
- త్వరలో తెలంగాణలో పట్టభద్రుల ఎమ్మెల్సీ ఎన్నికలు
- అభ్యర్థులను ఎంపిక చేసిన సోనియా గాంధీ
- రాములు నాయక్, చిన్నారెడ్డిలకు చాన్స్
- ఓ అభ్యర్థిని ఖరారు చేసిన టీఆర్ఎస్
తెలంగాణలో త్వరలో జరిగే పట్టభద్రుల ఎమ్మెల్సీ ఎన్నికలకు ప్రధాన పార్టీలు తమ అభ్యర్థులను ప్రకటిస్తున్నాయి. తాజాగా కాంగ్రెస్ పార్టీ తమ అభ్యర్థులను ఖరారు చేసింది. నల్గొండ-ఖమ్మం-వరంగల్ పట్టభద్రుల ఎమ్మెల్సీ స్థానం కోసం రాములు నాయక్.... హైదరాబాద్-రంగారెడ్డి-మహబూబ్ నగర్ ఎమ్మెల్సీ స్థానం కోసం జి.చిన్నారెడ్డిలను ఎంపిక చేశారు. వీరిద్దరి అభ్యర్థిత్వానికి కాంగ్రెస్ అధినేత్రి సోనియా గాంధీ ఆమోదం తెలిపారు.
అటు, టీఆర్ఎస్ పార్టీ ఇటీవలే ఓ అభ్యర్థి పేరు ప్రకటించింది. వరంగల్-ఖమ్మం-నల్గొండ పట్టభద్రుల స్థానానికి సిట్టింగ్ ఎమ్మెల్సీ పల్లా రాజేశ్వర్ రెడ్డి పేరునే ఖరారు చేస్తూ సీఎం కేసీఆర్ నిర్ణయం తీసుకున్నారు. ఇక హైదరాబాద్-రంగారెడ్డి-మహబూబ్ నగర్ పట్టభద్రుల స్థానానికి అభ్యర్థిని త్వరలోనే ప్రకటించనున్నారు. ప్రస్తుతం దీనికి సంబంధించిన కసరత్తులు జరుగుతున్నట్టు తెలుస్తోంది. ఇక టీడీపీ తరఫున ఆ పార్టీ తెలంగాణ అధ్యక్షుడు ఎల్.రమణ హైదరాబాద్-రంగారెడ్డి-మహబూబ్ నగర్ ఎమ్మెల్సీ స్థానానికి పోటీపడతారని ప్రచారం జరుగుతోంది.