Kamal Haasan: డీఎంకే ఎంపీ రాజా వ్యాఖ్యలను నేనెప్పుడూ సమర్థించలేదు: కమలహాసన్
- సీఎం పళనిస్వామిని స్టాలిన్ కాలిచెప్పుతో పోల్చిన రాజా
- రాజా వ్యాఖ్యలను కమల్ సమర్థించినట్టుగా ప్రచారం
- సోషల్ మీడియా ప్రచారాన్ని ఖండించిన కమల్
- రాజా వ్యాఖ్యలను తాను సమర్థించలేదని స్పష్టీకరణ
ఇటీవల డీఎంకే ఎంపీ ఏ.రాజా మాట్లాడుతూ, సీఎం పళనిస్వామిని స్టాలిన్ కాలి చెప్పుతో పోల్చారు. ఇంకా పలువిధాలుగా పళనిస్వామిని కించపరిచే విధంగా విమర్శలు గుప్పించారు. అయితే రాజా వ్యాఖ్యలను ఎంఎన్ఎం పార్టీ అధినేత కమలహాసన్ సమర్థిస్తున్నారంటూ సోషల్ మీడియాలో ప్రచారం జరుగుతోంది.
ఈ ప్రచారాన్ని కమల్ తాజాగా ఖండించారు. ఎంపీ రాజా వ్యాఖ్యలను తానెక్కడా సమర్థించలేదని స్పష్టం చేశారు. తమపై తప్పుడు ప్రచారం చేస్తున్నారని మండిపడ్డారు. సోషల్ మీడియాలో జరిగే అసత్య ప్రచారాలను నమ్మవద్దని విజ్ఞప్తి చేశారు. కమల్ పై జరుగుతున్న దుష్ప్రచారం పట్ల చట్టపరమైన చర్యలు తీసుకుంటామని ఎంఎన్ఎం పార్టీ వర్గాలు కూడా హెచ్చరించాయి.
