TDP: కరోనాతో కన్నుమూసిన టీడీపీ సీనియర్ నేత బొడ్డు భాస్కర రామారావు
- కరోనాతో విశాఖలోని ఓ ఆసుపత్రిలో చేరిన రామారావు
- 1994, 2004 లో పెద్దాపురం నుంచి ఎమ్మెల్యేగా ఎన్నిక
- టీడీపీ నేతల సంతాపం
కరోనా మహమ్మారి మరో ప్రముఖుడిని బలితీసుకుంది. టీడీపీ సీనియర్ నేత, తూర్పుగోదావరి జిల్లా జడ్పీ మాజీ చైర్మన్ బొడ్డు భాస్కర రామారావు కరోనాతో పోరాడుతూ కన్నుమూశారు. ఆయన వయసు 72 సంవత్సరాలు. కరోనా వైరస్ సంక్రమించడంతో విశాఖపట్టణంలోని ఓ ప్రైవేటు ఆసుపత్రిలో చేరిన ఆయన అక్కడ చికిత్స పొందుతూ ఈ ఉదయం తుదిశ్వాస విడిచారు.
1994, 2004లో పెద్దాపురం నుంచి శాసనసభ్యుడిగా ఎన్నికైన రామారావు ఎమ్మెల్సీగానూ పనిచేశారు. పెదపూడి మండలంలోని పెద్దాడకు చెందిన ఆయన అంతకుముందు అంటే 1982లో సామర్లకోట సమితి అధ్యక్షుడిగానూ సేవలు అందించారు. ఆ తర్వాత 1984లో జడ్పీ చైర్మన్‌గా సేవలు అందించారు. రామారావు మృతికి పలువురు టీడీపీ నేతలు సంతాపం తెలిపారు.