hema: సినీ న‌టి హేమ చేసిన ఆరోప‌ణ‌ల‌పై 'మా' అధ్య‌క్షుడు నరేశ్ స్పంద‌న!
- మా అసోసియేషన్‌ గౌరవాన్ని దెబ్బతీసేలా ఆమె వ్యాఖ్య‌లు
- హేమపై క్రమశిక్షణ సంఘానికి ఫిర్యాదు చేస్తాం
- కమిటీ తీసుకునే నిర్ణయం ప్రకారం తగిన చర్యలుంటాయన్న నరేశ్
మూవీ ఆర్టిస్ట్స్‌ అసోసియేషన్‌ (మా) ఎన్నికలు టాలీవుడ్ లో వేడి పుట్టిస్తోన్న విష‌యం తెలిసిందే. ప్రకాశ్ రాజ్, జీవిత, మంచు విష్ణు, హేమ అధ్యక్ష పదవి కోసం పోటీ పడుతూ ఒక‌రిపై ఒక‌రు చేసుకుంటోన్న వ్యాఖ్య‌లు చ‌ర్చ‌నీయాంశంగా మారుతున్నాయి. రూ.5 కోట్ల నిధుల్లో రూ.3 కోట్లు మాత్రమే మా అధ్య‌క్షుడు నరేశ్ ఇప్పటివరకు ఖర్చు చేశారని, మిగతా డ‌బ్బంతా ఏమైంద‌ని హేమ ఇటీవ‌ల నిల‌దీసిన విష‌యం తెలిసిందే. ఈ విషయంపై 200 మంది అసోసియేషన్‌ సభ్యులకు హేమ లేఖలు రాశారు.
హేమ చేసిన వ్యాఖ్య‌లపై నరేశ్ తో పాటు జీవితా రాజ‌శేఖ‌ర్ స్పందించారు. హేమ చేసిన ఆరోప‌ణ‌ల‌ను నరేశ్ ఖండిస్తూ ఈ రోజు ఉదయం పత్రికా ప్రకటన విడుదల చేశారు. మా అసోసియేషన్‌ గౌరవాన్ని దెబ్బతీసేలా ఆమె వ్యాఖ్య‌లు చేస్తున్నార‌ని, ఆమెపై క్రమశిక్షణ సంఘానికి ఫిర్యాదు చేస్తామని తెలిపారు. కమిటీ తీసుకునే నిర్ణయం ప్రకారం తగిన చర్యలు తీసుకుంటామని హెచ్చ‌రించారు.
కొవిడ్ ప‌రిస్థితుల దృష్ట్యా ‘మా’ ఎన్నికలు ఎప్పుడు నిర్వహించాలన్న విషయంపై సర్వసభ్య సమావేశం ఏర్పాటు చేసి నిర్ణయం తీసుకుంటామని, పరిస్థితులకు అనుగుణంగానే ఎన్నికలు జరుగుతాయని నరేశ్ చెప్పారు.
మరోపక్క, హేమ చేసిన వ్యాఖ్య‌లు స‌రికాద‌ని జీవితా రాజ‌శేఖ‌ర్ అన్నారు. మా స‌భ్యుల‌ను తిక‌మ‌క పెట్టేలా వ్యాఖ్య‌లు చేయ‌కూడ‌ద‌ని ఆమె హితవు పలికారు. నిధులు ఉండేది స‌భ్యుల కోస‌మేన‌ని, అవేమీ సొంత ప్ర‌యోజ‌నాల‌కు వాడుకునేందుకు కాద‌ని జీవితా రాజ‌శేఖ‌ర్ చెప్పారు. స‌భ్యులు వారికి ఇష్టం వ‌చ్చిన వారికి ఓట్లు వేస్తారని, వారికి ఆ స్వేచ్ఛ ఉంటుంద‌ని ఆమె అన్నారు.
