Venkatesh Prasad: పుజారానే తీసేశారు.. కేఎల్ రాహుల్ ఎంత?: వెంకటేశ్ ప్రసాద్
- ఫామ్ కోల్పోయి ఇబ్బంది పడుతున్న కేఎల్ రాహుల్
- కౌంటీల్లో ఆడి ఫామ్ ను సాధించాలన్న వెంకటేశ్ ప్రసాద్
- గతంలో పుజారా ఇదే పని చేశాడన్న మాజీ పేసర్
టీమిండియా బ్యాట్స్ మెన్ కేఎల్ రాహుల్ ఫామ్ లేమితో ఇబ్బంది పడుతున్న సంగతి తెలిసిందే. ఆస్ట్రేలియాతో జరుగుతున్న టెస్ట్ సిరీస్ తొలి రెండు టెస్టుల్లో రాహుల్ పూర్తిగా విఫలమయ్యాడు. తాజాగా బీసీసీఐ ఆయనను వైస్ కెప్టెన్సీ నుంచి కూడా తొలగించింది. మరోవైపు, బీకర ఫామ్ లో ఉన్న శుభ్ మన్ గిల్ ను రిజర్వ్ బెంచ్ లో కూర్చోబెట్టి కేఎల్ రాహుల్ ను ఆడిస్తుండటంపై విమర్శలు కూడా వెల్లువెత్తుతున్నాయి. ఆసీస్ తో చివరి రెండు టెస్టులకు కూడా రాహుల్ ఆడతాడని హెడ్ కోచ్ ద్రావిడ్ స్పష్టం చేశారు. ఈ నేపథ్యంటో కేఎల్ రాహుల్ పై టీమిండియా మాజీ పేసర్ వెంకటేశ్ ప్రసాద్ కీలక వ్యాఖ్యలు చేశారు.
కేఎల్ రాహుల్ కు, తనకు మధ్య విభేదాలు ఉన్నాయని కొందరు అనుకుంటున్నారని... అందులో నిజం లేదని వెంకటేశ్ ప్రసాద్ చెప్పారు. రాహుల్ కు అంతా మంచే జరగాలని కోరుకునే వ్యక్తుల్లో తాను కూడా ఒకడినని అన్నారు. ప్రస్తుతం ఉన్న ఫామ్ తో ఆడితే ఆయన ఆత్మవిశ్వాసం మరింత సన్నగిల్లే అవకాశం ఉందని చెప్పారు. పాత ఫామ్ ను మళ్లీ అందుకోవడం రాహుల్ కు చాలా అవసరమని... మళ్లీ ఫామ్ లోకి రావాలంటే ఇంగ్లండ్ లో కౌంటీ క్రికెట్ ఆడటమే మార్గమని సూచించారు. ఇప్పటికే రంజీ సీజన్ ముగియడం వల్ల... కౌంటీ క్రికెట్ లో ఆడి భారత జట్టులో మళ్లీ స్థానాన్ని సాధించుకోవాలని చెప్పారు.
టీమ్ లో పుజారా స్థానాన్ని కోల్పోయినప్పుడు ఇదే పని చేశాడని వెంకటేశ్ ప్రసాద్ గుర్తు చేశారు. పుజారాకు ఉన్నంత అనుభవం రాహుల్ కు లేదని చెప్పారు. 100 టెస్టులు ఆడిన పుజారానే పక్కన పెట్టారని... అలాంటప్పుడు రాహుల్ ను ఇంకా ఆడించడంలో అర్థం లేదని అన్నారు. ఈ మేరకు వెంకటేశ్ ప్రసాద్ వరుస ట్వీట్లు చేశారు.
