Raviteja: ఏక్ ధమ్, ఏక్ ధమ్ నచ్చేశావే.. ఎల్లాకిల్లా పడేశావే అంటున్న రవితేజ
- రవితేజ హీరోగా నటించిన ‘టైగర్ నాగేశ్వరరావు’
- తొలి పాట విడుదల చేసిన చిత్ర బృందం
- అక్టోబర్ 20న ప్రేక్షకుల ముందుకు రానున్న సినిమా
హిట్, ఫ్లాప్స్‌తో సంబంధం లేకుండా వరుస సినిమాలు చేస్తుంటారు సీనియర్ హీరో రవితేజ. వాల్తేరు వీరయ్య, రావణాసుర తర్వాత ఈ ఏడాది ఆయన నుంచి వస్తున్న చిత్రం ‘టైగర్ నాగేశ్వరరావు’. ప్యాన్ ఇండియా స్థాయిలో రాబోతున్న ఈ సినిమాకు వంశీ దర్శకత్వం వహిస్తున్నాడు. అభిషేక్ అగర్వాల్ దీనిని నిర్మిస్తున్నారు. ఈ సినిమాతో నుపూర్ సనన్‌ టాలీవుడ్‌ కు హీరోయిన్‌గా పరిచయం అవుతోంది. గాయత్రి భరద్వాజ్, రేణు దేశాయ్, అనుపమ్ ఖేర్ ఇతర ముఖ్యపాత్రలు పోషిస్తున్నారు. రవితేజ ఇందులో స్టూవర్టుపురం దొంగ పాత్రలో కనిపించనున్నారు. ఇప్పటికే విడుదలైన ట్రైలర్‌ సినిమాపై అంచనాలను పెంచింది. తాజాగా ఈ సినిమా నుంచి ఫస్ట్ సింగిల్ పాట విడుదలైంది.
‘ఏక్ ధమ్, ఏక్ ధమ్ నచ్చేశావే.. ఎల్లాకిల్లా పడేశావే’అంటూ సాగే పాటలో హీరో రవితేజ.. హీరోయిన్‌ నుపూర్ సనన్‌ని ఆట పట్టిస్తూ కనిపించాడు. జీవీ ప్రకాష్ కుమార్ సంగీతం అందించిన ఈ పాటను అనురాగ్ కులకర్ణి పాడాడు. భాస్కరభట్ల రవికుమార్ సాహిత్యం అందించాడు. కాలేజీ బ్యాక్‌డ్రాప్‌లో సాగే ఈ పాటకు శేఖర్ మాస్టర్ కొరియోగ్రఫీ చేశాడు. కాగా, ఈ చిత్రం దసరా కానుకగా పలు భాషల్లో అక్టోబర్ 20న విడుదల కానుంది.
