Vaishnavi Chaithanya: సిద్ధూ జొన్నలగడ్డ జోడీగా 'బేబీ' బ్యూటీ!
- 'బేబి' సినిమాతో హిట్ కొట్టిన వైష్ణవి చైతన్య
- ఆనంద్ దేవరకొండ జోడీగా మరో సినిమా
- ఆశిష్ మూవీలోనూ దక్కిన ఛాన్స్
- బొమ్మరిల్లు భాస్కర్ ప్రాజెక్టులోను అవకాశం
ఇండస్ట్రీకి పరిచయమైన కథానాయికలు తమ మొదటి సినిమాతోనే హిట్ కొట్టాలని కలలు కంటారు. కానీ కొంతమంది విషయంలో మాత్రమే ఆ కల నిజమవుతుంది. అలాంటి కథానాయికలలో వైష్ణవి చైతన్య కూడా కనిపిస్తుంది. 'బేబి' సినిమాతో హీరోయిన్ గా ఎంట్రీ ఇచ్చిన వైష్ణవి, ఆ సినిమా సక్సెస్ తో యూత్ లో మంచి క్రేజ్ ను సంపాదించుకుంది.
ఆ తరువాత ఆమె ఆనంద్ దేవరకొండ జోడీగానే మరో సినిమాను అంగీకరించింది. ప్రస్తుతం ఈ సినిమా షూటింగు దశలో ఉంది. ఇక ఆశిష్ సరసన కూడా హీరోయిన్ గా ఛాన్స్ కొట్టేసింది. దిల్ రాజు బ్యానర్లో ఈ సినిమా రూపొందుతోంది. ఈ నేపథ్యంలో ఆమె మరో సినిమాలో చోటు దక్కించుకుంది. అదీ సిద్ధూ జొన్నలగడ్డ జోడీగా.
శ్రీవేంకటేశ్వర సినీ చిత్ర బ్యానర్లో సిద్ధూ జొన్నలగడ్డ హీరోగా 'బొమ్మరిల్లు భాస్కర్' ఒక సినిమా చేస్తున్నాడు. ఆగస్టులోనే ఈ సినిమా పూజా కార్యక్రమాలను జరుపుకుంది. ఈ సినిమాలో కథానాయికగా వైష్ణవి చైతన్యను ఎంపిక చేశారు. ఈ రోజున ఆమె పుట్టినరోజు కావడంతో ఈ సినిమా టీమ్ ఆమెకి శుభాకాంక్షలు తెలియజేసింది.
