Devara: పారితోషికం పెంచేసిన జాన్వీ కపూర్‌!
- రెండు చిత్రాలతోనే పెరిగిన జాన్వీ క్రేజ్‌
- త్వరలోనే సెట్స్‌ మీదకు రెండో సినిమా
- ఆలోచన మార్చుకున్న నాని నిర్మాతలు
ప్రముఖ నటి స్వర్గీయ శ్రీదేవి కూతురు జాన్వీ కపూర్‌ 'దేవర' చిత్రంతో తెలుగు చిత్ర సీమలోకి హీరోయిన్‌గా ఎంట్రీ ఇస్తున్న సంగతి తెలిసిందే. ఎన్టీఆర్‌ హీరోగా నటిస్తున్న ఈ చిత్రానికి కొరటాల శివ దర్శకుడు. ఈ నెల 27న చిత్రం ప్రేక్షకుల ముందుకు రానుంది. కాగా, జాన్వీ కపూర్‌ ఈ చిత్రంతో పాటు రామ్‌చరణ్‌ సరసన కూడా ఓ చిత్రంలో నటించడానికి అంగీకరించారు. ఇటీవలే ఈ చిత్రం పూజా కార్యక్రమాలు ఘనంగా జరిగాయి.
త్వరలోనే ఈ చిత్రం కూడా సెట్స్‌ మీదకు కూడా వెళ్లనుంది. బుచ్చిబాబు దర్శకత్వంలో తెరకెక్కనున్న ఈ చిత్రం గ్రామీణ నేపథ్యంలో కొనసాగే పీరియాడికల్‌ డ్రామాగా రూపొందనుంది. ఇక ఈ రెండు చిత్రాలతోనే జాన్వీ కపూర్‌ టాలీవుడ్‌ అగ్రహీరోయిన్‌ జాబితాలో చేరిపోయారు. దేవర ప్రమోషనల్‌ కంటెంట్‌ ద్వారా ఈమె క్రేజ్‌ మరింత పెరిగింది. దీంతో జాన్వీ తన పారితోషికాన్ని పెంచేసిందని టాలీవుడ్‌ వర్గాల సమాచారం.
హీరో నాని-శ్రీకాంత్‌ ఓదెల దర్శకత్వంలో రూపొందనున్న తాజా చిత్రం కోసం నిర్మాతలు జాన్వీని హీరోయిన్‌గా అనుకున్నారట. అయితే ఆమె పారితోషికం తెలుసుకున్న వాళ్లు ఆ ఆలోచనను విరమించుకుని, మరో హీరోయిన్‌ అన్వేషణలో ఉన్నారని తెలిసింది. సదరు జాన్వీ ప్లేస్‌లో ఓ మిడ్‌ రేంజ్‌ హీరోయిన్‌ను తమ సినిమాలో తీసుకోవాలని అనుకుంటున్నారట.
ఇటీవలే 'సరిపోదా శనివారం' చిత్రంతో ప్రేక్షకులను పలకరించిన నాని, త్వరలోనే శైలేష్‌ కొలను దర్శకత్వంలో తెరకెక్కనున్న హిట్‌-3 సినిమా చిత్రీకరణలో పాల్గొంటాడు. 2025 జనవరి నుంచి నాని-శ్రీకాంత్‌ ఓదెల చిత్రం ప్రారంభం కానుంది.
