Pushpa 2: కొత్త పోస్టర్‌తో హింట్‌ ఇచ్చిన 'పుష్ప-2: ది రూల్' మేకర్స్‌
- 'పుష్ప-2' కౌంట్‌డౌన్‌ పోస్టర్‌ విడుదల
- ఆస్తకి పెంచుతున్న కొత్త పోస్టర్‌
- త్వరలోనే ట్రైలర్‌ రాబోతుందని పోస్టర్‌లో హింట్‌
ఇప్పుడు భారతదేశంలోని సినీ ప్రేమికులే కాదు.. ప్రపంచవ్యాప్తంగా అందరూ ఎంతగానో ఆసక్తిగా ఎదురుచూస్తున్న చిత్రం 'పుష్ప-2' ది రూల్. అల్లు అర్జున్‌ కథానాయకుడిగా సుకుమార్‌ దర్శకత్వంలో రూపొందుతున్న ఈ చిత్రంపై అంచనాలు భారీ స్థాయిలో ఉన్నాయి. దీనికి ముందు ఇదే కాంబినేషన్‌లో వచ్చిన 'పుష్ప ది రైజ్‌' సంచలన విజయం సాధించడంతో పాటు ఆ చిత్రంలోని అల్లు అర్జున్‌ మేనరిజం, స్టయిల్‌, సినిమా మేకింగ్‌, సుకుమార్‌ బ్రిలియంట్‌ స్క్రీన్‌ప్లే ప్రేక్షకులకు విపరీతంగా నచ్చడంతో సీక్వెల్‌ కోసం ఉత్కంఠగా ఎదురుచూస్తున్నారు.
డిసెంబరు 5న 'పుష్ప-2' ప్రేక్షకుల ముందుకు రానుంది. అంటే ఇంకా 30 రోజులు మాత్రమే ఉంది. ప్రస్తుతం చిత్రీకరణ దశలో వున్న ఈ చిత్రం మరో వైపు శరవేగంగా నిర్మాణానంతర పనులను కూడా జరుపుకుంటోంది. అయితే 'పుష్ప' పార్ట్‌-1లో పుష్పరాజ్‌, భన్వర్‌ సింగ్‌ షెకావత్‌ మధ్య వచ్చిన సన్నివేశాలు ప్రేక్షకులను ఎంతగా ఆకట్టుకున్నాయో ప్రత్యేకంగా చెప్పాల్సిన అవసరం లేదు.
అయితే ఇప్పుడు 'పుష్ప-2 ది రూల్' చిత్రంలో వీరిద్దరి మధ్య అసలైన వార్‌ జరగబోతుందని మేకర్స్‌ ఈ రోజు విడుదల చేసిన కౌంట్‌ డౌన్‌ పోస్టర్‌లో హింట్‌ ఇచ్చారు. రక్తంతో ఎరుపెక్కిన పోస్టర్‌లో పోటా పోటీగా ఇద్దరు కనిపించడం అందరిలోనూ ఇంట్రెస్ట్‌ను క్రియేట్‌ చేసింది. పుష్ప-2లో వీరిద్దరి మధ్య సన్నివేశాలు ఎంతో పవర్‌ఫుల్‌గా, ఎవరూ ఊహించని విధంగా ఉంటాయని తెలిసింది.
భన్వర్‌ సింగ్‌ షెకావత్‌ వర్సెస్‌ పుష్పరాజ్‌ మధ్య వార్‌ పుష్ప-2లో ఏ స్థాయిలో ఉంటుందో ఈ పోస్టర్‌ తెలియజేస్తుంది. ఇక త్వరలోనే ట్రైలర్‌ను కూడా విడుదల చేయడానికి సన్నాహాలు చేస్తున్నారు.