Charan: 'గేమ్ ఛేంజర్' నుంచి రొమాంటిక్ సాంగ్ రిలీజ్!
- 'గేమ్ ఛేంజర్' నుంచి 'నానా హైరానా' సాంగ్
- చరణ్ - కియారాపై చిత్రీకరించిన పాట
- తమన్ వదిలిన మరో బ్యూటిఫుల్ మెలోడీ
- శ్రేయా ఘోషల్ - కార్తీక్ ఆలపించిన పాట
- సంక్రాంతికి విడుదల కానున్న సినిమా
చరణ్ హీరోగా రూపొందుతున్న భారీ బ‌డ్జెట్ చిత్రం 'గేమ్ ఛేంజర్'. అనేక అంచ‌నాల న‌డుమ తెలుగు .. త‌మిళ .. హిందీ భాష‌ల్లో వచ్చే సంక్రాంతి సంద‌ర్భంగా జ‌న‌వ‌రి 10న విడుద‌ల‌వుతుంది. చరణ్ - కియారా అద్వానీ జోడీ మ‌ధ్య కెమిస్ట్రీని స్టార్ డైరెక్ట‌ర్ శంక‌ర్ ఎంత గొప్ప‌గా తెర‌కెక్కించారోన‌ని అభిమానులు, ప్రేక్ష‌కులు ఎంతో ఆస‌క్తిగా ఎదురుచూస్తున్నారు. ఎట్ట‌కేల‌కు ఈ నిరీక్ష‌ణ‌కు తెర‌ప‌డింది.
ఈ సినిమా నుంచి రొమాంటిక్ సాంగ్ విడుద‌లైంది. తెలుగులో ‘నా నా హైరానా’.. హిందీలో ‘జానా హైరాన్ సా’.. త‌మిళంలో ‘లై రానా’ అంటూ మెలోడీ ఆఫ్ ది ఇయ‌ర్‌గా ఈ పాట ప్రేక్ష‌కుల‌ను స‌మ్మోహ‌న‌ప‌రుస్తోంది. ఈ పాట‌ను తెలుగులో రామ‌జోగ‌య్య‌శాస్త్రి రాయ‌గా, త‌మిళంలో వివేక్‌, హిందీలో కౌశ‌ర్ మునీర్ రాశారు. ఈ పాట‌కు సంబంధించిన బీటీఎస్‌కు కూడా ప్రేక్ష‌కుల నుంచి అద్భుత‌మైన స్పంద‌న వ‌స్తోంది.
మేకింగ్ విష‌యానికి వ‌స్తే, శంక‌ర్ త‌న‌కు తానే సాటి అని మ‌రోసారి 'నా నా హైరానా' పాట‌తో నిరూపించుకున్నారు. న్యూజిలాండ్‌లో ఈ పాట‌ను ఇప్ప‌టివ‌ర‌కు ఎవ‌రూ చిత్రీక‌రించ‌ని విధంగా 'రెడ్ ఇన్‌ఫ్రా' కెమెరాతో చిత్రీక‌రించారు. ఒక్కో స‌న్నివేశం ఒక్కో పెయింటింగ్‌లా విజువ‌ల్ బ్యూటీతో ఈ పాట మ‌న‌సుని తేలిక ప‌రుస్తోంది. మ‌ళ్లీ మ‌ళ్లీ చూడాల‌నుకునేంత గొప్ప‌గా పాట‌లోని ప్ర‌తీ ఫ్రేమ్ ఉంది. మ్యూజిక్ డైరెక్ట‌ర్ తమన్ ఈ పాట‌ను ఫ్యూజ‌న్ మెలోడీగా ట్యూన్ చేశారు. సరిగ‌మ మ్యూజిక్ పార్ట్‌న‌ర్‌గా వ్య‌వ‌హ‌రిస్తోన్న 'గేమ్ చేంజ‌ర్' సినిమాలోని ఈ పాట‌ను శ్రేయా ఘోషల్, కార్తీక్ పాడారు. బాస్కో మార్టిస్ కొరియోగ్రఫీని అందించారు.
