లాక్ డౌన్ వేళ గృహ హింస నుండి మహిళలకు పూర్తి రక్షణ: ఏపీ మహిళాభివృద్ది, శిశు సంక్షేమ శాఖ

• ఏపీ మహిళాభివృద్ది, శిశు సంక్షేమ శాఖ సంచాలకులు డాక్టర్ కృతికా శుక్లా
• నిపుణుల ద్వారా బాధితులకు ఆరోగ్య, వైద్య, మానసిక, సాంఘిక, న్యాయ సహాయాలు
• రాష్ట్రంలోని 23 స్వధార్ గృహములలో సైతం బాధిత మహిళలకు వసతి, రక్షణ
• సహాయతా సంఖ్య 181తో పాటు జిల్లా స్దాయిలో తక్షణ సహాయం కోసం ఫోన్ నెంబర్లు

కరోనా కష్ట కాలంలో దీర్ఘకాల లాక్ డౌన్ నేపధ్యంలో గృహహింసను ఎదుర్కొంటున్న మహిళలకు ఆంధ్ర ప్రదేశ్ రాష్ట్ర మహిళాభివృద్ది, శిశు సంక్షేమ శాఖ బాసటగా నిలుస్తోంది. వారికి పూర్తి రక్షణను కల్పించే క్రమంలో పలు కార్యక్రమాలను అమలు చేస్తోంది. ప్రభుత్వ ఆధ్వర్యంలో ఇప్పటికే పని చేస్తున్న దిశ వన్ స్టాప్ కేంద్రాలలో 24గంటలు సిబ్బంది అందుబాటులో ఉండేలా చర్యలు చేపట్టింది. గృహహింసకు గురవుతున్న మహిళలకు ఇక్కడ అన్ని రకాల సేవలు అందుబాటులో ఉన్నాయి. బాధితులకు ఆరోగ్య, వైద్య, మానసిక, సాంఘిక, న్యాయ సహాయాలు నిపుణుల ద్వారా ఒకే చోట అందించేలా మహిళాభివృద్ది, శిశు సంక్షేమ శాఖ చర్యలు తీసుకుంది. మరోవైపు ఇరవై నాలుగు గంటలు ఉచిత న్యాయ, వైద్య, పోలీస్ సంరక్షణతో పాటు అత్యవసర వసతి కూడా ఇక్కడ అందించబడుతుంది.

వన్ స్టాప్ సెంటర్స్ కు వైద్య శాఖ, పోలీసు శాఖ ప్రత్యక్ష సహాయ సహకారాలను అందిస్తుండగా రాష్ట్ర మహిళాభివృద్ది, శిశు సంక్షేమ శాఖ విభిన్న శాఖల మధ్య సమన్వయ బాధ్యతలను సైతం పర్యవేక్షిస్తుందని రాష్ట్ర మహిళాభివృద్ధి, శిశు సంక్షేమ శాఖ సంచాలకులు, దిశ ప్రత్యేక అధికారి డాక్టర్ కృతికా శుక్లా ఈ సందర్భంగా తెలిపారు. ఈ వన్ స్టాప్ సెంటర్లలో లభించే అన్ని సేవలు ఉచితమేనని, ఈ కేంద్రాలలో మాత్రమే కాకుండా రాష్ట్రంలో గల 23 స్వధార్ గృహములలో సైతం బాధిత మహిళలకు వసతి, రక్షణ ఉచితంగా అందిస్తున్నామని వివరించారు. మహిళాభద్రత పరంగా అవసరమైన అన్ని చర్యలు తీసుకోవాలని ముఖ్యమంత్రి వైఎస్ జగన్ మోహన్ రెడ్డి ఇప్పటికే స్పష్టమైన ఆదేశాలు జారీ చేసారని, ఏ ఒక్కరూ గృహ హింసకు లోను కారాదని సూచించారని సిఎం ఆదేశాల మేరకు తమ శాఖ సష్టమైన కార్యాచరణతో ముందడుగు వేస్తోందన్నారు.

ఇదే క్రమంలో ఉచిత మహిళా సహాయతా సంఖ్య 181 కూడా బాధితుల సహాయార్ధం 24 గంటలు పనిచేస్తుందని కృతికా శుక్లా తెలిపారు. ఉచిత మహిళా సహాయతా సంఖ్య 181తో పాటు జిల్లాలలో తక్షణ సహాయం కోసం  తమ శాఖ నిర్ధేశించిన ఫోన్ నెంబర్లకు కూడా కాల్ చేయవచ్చని సంచాలకులు వివరించారు.  

శ్రీకాకుళం – 9110793708, విజయనగరం – 8501914624, విశాఖపట్నం – 6281641040, తూర్పు గోదావరి – 9603231497, పశ్చిమ గోదావరి – 9701811846, కృష్ణ – 9100079676, గుంటూరు – 9963190234, శ్రీ పొట్టి శ్రీరాములు నెల్లూరు – 9848653821, చిత్తూరు – 9959776697,  కర్నూలు – 9701052497,  చిత్తూరు – 9959776697, అనంతపురము – 8008053408 నెంబర్లలో రాష్ట్ర మహిళాభివృద్ది, శిశు సంక్షేమ శాఖ జిల్లా స్ధాయి అధికారులు అందుబాటులో ఉంటారని, నిస్పంకోచంగా ఎటువంటి సహాకారం కావాలన్నా ఈ నెంబర్లకు ఆయా జిల్లాల పరిధిలోని వారు ఫోన్ చేయవచ్చని డాక్టర్ కృతికా శుక్లా పేర్కొన్నారు.