కరోనా టీకా తీసుకున్న రష్యా దేశాధినేత పుతిన్ కు స్వల్పంగా సైడ్ ఎఫెక్ట్స్!

ప్రాణాంతక కరోనా వైరస్ ప్రపంచదేశాలను అతలాకుతలం చేస్తుండడంతో వ్యాక్సిన్లకు అత్యవసర వినియోగం కింద అనుమతులు ఇచ్చారు. అనేక దేశాల్లో అపోహలు ఉన్నప్పటికీ వ్యాక్సినేషన్ ముమ్మరంగా సాగుతోంది. దేశాధినేతలు సైతం వ్యాక్సిన్ వేయించుకుని ప్రజలను ఆ దిశగా ప్రోత్సహిస్తున్నారు. కాగా, రష్యా అధ్యక్షుడు వ్లాదిమిర్ పుతిన్ మంగళవారం నాడు కరోనా వ్యాక్సిన్ డోసు తీసుకోగా, ఆయనకు స్వల్పంగా సైడ్ ఎఫెక్ట్స్ కనిపించాయట. ఓ ఇంటర్వ్యూలో పుతిన్ స్వయంగా వెల్లడించారు.

వ్యాక్సిన్ తీసుకున్న తర్వాత రోజు ఉదయం కండరాల నొప్పులతో బాధపడ్డానని తెలిపారు. థర్మామీటర్ తో జ్వరం చూసుకుంటే సాధారణంగానే ఉందని పేర్కొన్నారు. వ్యాక్సిన్ కేంద్రంలోనే తాను కొద్దిగా అసౌకర్యానికి గురయ్యానని వివరించారు. తాను ఏ వ్యాక్సిన్ తీసుకున్నానో తెలియదని, తనకు ఏ వ్యాక్సిన్ ఇచ్చారో ఆ వైద్యుడికి మాత్రమే తెలుసని అన్నారు.