స్కాట్‌లాండ్‌ ఎస్టేట్‌లో చనిపోతే అంత్యక్రియలు కష్టమవుతాయని క్వీన్‌ ఎలిజబెత్-2 భావించారు: ప్రిన్సెస్ ఏనీ

స్కాట్‌లాండ్‌లోని ఎస్టేట్‌లో తాను చనిపోతే అంత్యక్రియలు నిర్వహించడం మరింత సంక్లిష్టమవుతుందని క్వీన్ ఎలిజబెత్-2 ఆందోళన చెందారని ఆమె కూతురు, యువరాణి ఏనీ వెల్లడించారు. ఏర్పాట్లలో తలెత్తే సమస్యల పట్ల ఆమె కలవరం చెందారని, దీంతో అంత్యక్రియలకు సంబంధించిన నిర్ణయాలకు దూరంగా ఉండాలంటూ ఆమెను ఒప్పించామని ఏనీ తెలిపారు. ఈ నెల 26న ప్రసారం కానున్న ఓ డాక్యుమెంటరీలో ఆమె పలు ఆసక్తికరమైన విషయాలను పంచుకున్నారు. కాగా 96 ఏళ్ల వయసులో క్వీన్ ఎలిజబెత్-2 సెప్టెంబర్ 8, 2022న బాల్మోరల్‌లోని స్కాటిష్ హైలాండ్ రిట్రీట్‌లో కన్నుమూసిన విషయం తెలిసిందే.

కాగా స్కాట్‌లాండ్‌లోని 50,000 ఎకరాల (20,000-హెక్టార్లు) ఎస్టేట్‌‌లోని నివాసాన్ని క్వీన్ ఎలిజబెత్-2 అమితంగా ఇష్టపడేవారు. వేసవిలో భర్త ఫిలిప్, కుటుంబంతో కలిసి 2 నెలలపాటు అక్కడే గడిపేవారు. 1852లో క్వీన్ విక్టోరియా కోసం ఆమె భర్త ప్రిన్స్ ఆల్బర్ట్ ఈ ఎస్టేట్‌‌ను కొనుగోలు చేశారు.