పాకిస్థాన్‌తో యుద్ధం తప్పదా?.. రాజ్‌నాథ్ సింగ్ వ్యాఖ్యలకు అర్థం అదేనా?

భారతదేశంపై దాడికి సాహసించే వారికి తగిన బుద్ధి చెప్పడం రక్షణ మంత్రిగా తన బాధ్యత అని కేంద్ర రక్షణ శాఖ మంత్రి రాజ్‌నాథ్ సింగ్ ఆదివారం స్పష్టం చేశారు. ఇటీవల జమ్మూకశ్మీర్‌లోని పహల్గామ్‌లో జరిగిన ఉగ్రదాడి నేపథ్యంలో ఆయన ఈ వ్యాఖ్యలు చేశారు. ఏప్రిల్ 22న జరిగిన ఈ ఘటనలో 26 మంది పౌరులు ప్రాణాలు కోల్పోయిన సంగతి తెలిసిందే.

ఢిల్లీలో జరిగిన 'సంస్కృతి జాగరణ్ మహోత్సవ్' కార్యక్రమంలో పాల్గొన్న రాజ్‌నాథ్ సింగ్ మాట్లాడుతూ ప్రధాని నరేంద్ర మోదీ పనితీరు, దృఢ సంకల్పం గురించి ప్రజలకు బాగా తెలుసునని అన్నారు. "ప్రధాని నరేంద్ర మోదీ నాయకత్వంపై మీకు పూర్తి విశ్వాసం ఉంది. ఆయన పని చేసే విధానం, నిశ్చయం మీకు సుపరిచితమే. మీరు ఏది కోరుకుంటున్నారో అది తప్పకుండా జరుగుతుందని నేను మీకు హామీ ఇస్తున్నాను" అని ఆయన సభికులను ఉద్దేశించి పేర్కొన్నారు.

దేశ భద్రత విషయంలో తన బాధ్యతను గుర్తుచేస్తూ "ఒకవైపు మన సైనికులు యుద్ధభూమిలో పోరాడుతూ దేశ భౌతిక రూపాన్ని కాపాడుతుంటే, మరోవైపు మన ఋషులు, జ్ఞానులు జీవ భూమిలో పోరాడుతూ దేశ ఆధ్యాత్మిక రూపాన్ని పరిరక్షిస్తున్నారు. రక్షణ మంత్రిగా, మన సైనికులతో కలిసి దేశ సరిహద్దుల భద్రతను కాపాడటం నా బాధ్యత. మన దేశంపై దాడికి తెగించేవారికి గట్టిగా బదులివ్వడం కూడా నా బాధ్యతే" అని రాజ్‌నాథ్ సింగ్ ఉద్ఘాటించారు. భారతదేశ బలం కేవలం సైనిక శక్తిలోనే కాకుండా, దాని సంస్కృతి, ఆధ్యాత్మికతలో కూడా ఉందని ఆయన అన్నారు.