Rajadhani: బస్సు నడుపుతుండగా అకస్మాత్తుగా ఫిట్స్ రావడంతో క్వాలిస్‌ను ఢీకొట్టిన డ్రైవర్
- అదుపు తప్పిన బస్సు
- దెబ్బతిన్న వాహనాల ముందు భాగాలు
- ప్రయాణికులకు స్వల్ప గాయాలు
ఆర్టీసీ బస్సు డ్రైవర్‌కు అకస్మాతుగా ఫిట్స్ రావడంతో బస్సు అదుపుతప్పి క్వాలిస్‌ను ఢీకొట్టింది. పెను ప్రమాదమేమీ జరగకున్నా కొందరు ప్రయాణికులకు స్వల్ప గాయాలయ్యాయి. కామారెడ్డి మండలం అడ్లూర్ బైపార్ జాతీయ రహదారి వద్ద ఈ ఘటన జరిగింది. హైదరాబాద్ నుంచి నిజామాబాద్ వెళుతున్న నిజామాబాద్ డిపో-2 రాజధాని బస్సు డ్రైవర్ రాంలాల్‌‌కు అడ్లూరు జాతీయ రహదారి వద్దకు రాగానే ఫిట్స్ వచ్చాయి.
దీంతో బస్సు అదుపుతప్పి డివైడర్‌ను దాటి ఎదురుగా వస్తున్న క్వాలిస్‌ను ఢీకొట్టింది. ఈ ఘటనలో క్వాలిస్ 100 మీటర్ల దూరం దూసుకెళ్లి సైడ్ వాల్‌ను ఢీకొట్టింది. ఈ ప్రమాదంలో బస్సు, క్వాలిస్ ముందు భాగాలు దెబ్బతిన్నాయి. బస్సులోని కొందరు ప్రయాణికులకు స్వల్ప గాయాలయ్యాయి. వెంటనే క్షతగాత్రులను స్థానిక ఆసుపత్రికి తరలించారు. డ్రైవర్‌కు ప్రాణాపాయం లేదని వైద్యులు తెలిపారు.