LB Nagar murder: ఎల్బీనగర్ ప్రేమోన్మాది కేసులో సంచలన విషయాలు
- కన్న తండ్రిని హతమార్చిన నిందితుడు
- సుత్తితో తలపై కొట్టి చంపేసిన శివకుమార్
- ఇదే ప్రేమ విషయంలో మందలించడంతో దారుణం
- బయటకు పొక్కనివ్వని గ్రామస్తులు
హైదరాబాద్ లోని ఎల్బీనగర్ లో ప్రేమోన్మాది దాడి ఘటనలో సంచలన విషయాలు బయటకు వస్తున్నాయి. తన ప్రేమను నిరాకరించిందన్న కక్షతో యువతి, ఆమె సోదరుడిపై శివకుమార్ దాడి చేసిన విషయం తెలిసిందే. ఈ దాడిలో తీవ్ర గాయాలపాలైన యువతి సోదరుడు పృథ్వీ చనిపోయాడు. కాగా, నిందితుడు శివకుమార్ ది మొదటి నుంచి ఉద్రిక్త స్వభావమేనని గ్రామస్తులు చెబుతున్నారు. ఇదే ప్రేమ విషయంలో తండ్రి మందలించాడని తెలిపారు. దీంతో కన్నతండ్రి అని కూడా చూడకుండా సుత్తితో కొట్టి చంపాడని సమాచారం. అయితే, ఈ హత్య విషయాన్ని గ్రామస్తులు బయటకు రానివ్వలేదని తెలుస్తోంది. తాజాగా పృథ్వీ హత్య నేపథ్యంలో పోలీసులు సమగ్ర విచారణ జరుపుతున్నారు. శివకుమార్ గతంలో చేసిన నేరాలకు సంబంధించిన వివరాలను కూపీ లాగుతున్నారు.
రంగారెడ్డి జిల్లా నేరెళ్లచెరువు గ్రామానికి చెందిన శివకుమార్ ఆదివారం దారుణానికి తెగబడ్డాడు. తన ప్రేమను అంగీకరించలేదని క్లాస్ మేట్ సంఘవిపై దాడికి యత్నించాడు. అడ్డుకున్న సంఘవి సోదరుడు పృథ్వీని కత్తితో పొడిచి చంపాడు. ఆదివారం మధ్యాహ్నం ఎల్బీనగర్ పరిధిలోని ఆర్టీసీ కాలనీలో ఈ దారుణం చోటుచేసుకుంది. జిల్లాలోని ఫరూక్ నగర్ మండలం నేరెళ్లచెరువు గ్రామానికి చెందిన శివకుమార్.. షాద్ నగర్ లోని స్కూల్ లో తనతో పాటు చదువుకున్న సంఘవిని ప్రేమించాడు. అప్పటి నుంచే సంఘవిని వేధిస్తున్నాడు.
పదో తరగతి తర్వాత సంఘవి కుటుంబం హైదరాబాద్ లోని ఎల్బీనగర్ లోని అద్దె ఇంట్లోకి మారింది. రామాంతపూర్ లోని హోమియో కాలేజీలో సంఘవి నాలుగో సంవత్సరం చదువుతుండగా.. ఆమె సోదరుడు పృథ్వీ ఇంజనీరింగ్ పూర్తిచేసి ఉద్యోగ ప్రయత్నాల్లో ఉన్నాడు. శివకుమార్ డిగ్రీ పూర్తి చేసి రామాంతపూర్ లో ఉంటున్నాడు. ఇటీవల సంఘవిని కలిసి మరోమారు తన ప్రేమ విషయం చెప్పగా.. సంఘవి మందలించినట్లు సమాచారం. దీంతో పగబట్టిన శివకుమార్.. ఆదివారం ఆర్టీసీ కాలనీలోని సంఘవి ఇంటికి వెళ్లి కత్తితో దాడి చేశాడు.