జిమ్‌కు వెళ్లక్కర్లేదు.. ఆ పనులు చేస్తే చాలు: వయసుకు బ్రేక్ వేయొచ్చు!

యవ్వనంగా కనిపించేందుకు గంటల తరబడి జిమ్‌లో కసరత్తులు చేయాల్సిన అవసరం లేదు. మనసుకు నచ్చిన సంగీతం విన్నా, కాసేపు మ్యూజియంలను సందర్శించినా చాలు.. వృద్ధాప్య ఛాయలు దరిచేరవని పరిశోధనలు చెబుతున్నాయి. కళలు, సాంస్కృతిక కార్యక్రమాల్లో చురుగ్గా పాల్గొనడం వల్ల శారీరక వ్యాయామంతో సమానమైన ప్రయోజనాలు అందుతాయని శాస్త్రవేత్తలు గుర్తించారు. ఈ అలవాట్లు జీవసంబంధమైన వృద్ధాప్య ప్రక్రియను దాదాపు 4 శాతం వరకు నెమ్మదింపజేస్తాయని స్టడీ వెల్లడించింది.

వేలాది మందిపై జరిపిన పరిశోధన
కళలు, సాంస్కృతిక కార్యక్రమాల్లో పాల్గొనడం వల్ల దీర్ఘకాలిక ఆరోగ్యం ఎలా మెరుగవుతుందో తెలుసుకునేందుకు పరిశోధకులు వేలాది మంది పెద్దలపై అధ్యయనం చేశారు. రోజూ పాటలు వినడం, లైవ్ కన్సర్ట్‌లకు వెళ్లడం, మ్యూజియంలు, ఎగ్జిబిషన్‌లను సందర్శించడం వంటి అలవాట్లు ఉన్నవారి రికార్డులను పరిశీలించారు. ఈ అలవాట్లు ఎక్కువగా ఉన్నవారిలో వృద్ధాప్య లక్షణాలు చాలా నిదానంగా వస్తున్నట్లు కనుగొన్నారు.

ఒత్తిడిని తగ్గించే అద్భుత సాధనాలు
సాంస్కృతిక కార్యక్రమాల్లో పాల్గొనడం వల్ల మెదడు చురుగ్గా పనిచేస్తుందని, సామాజిక సంబంధాలు మెరుగవుతాయని నిపుణులు చెబుతున్నారు. ఇవి మానసిక ఉల్లాసాన్ని ఇవ్వడమే కాకుండా శరీరంలో ఒత్తిడి స్థాయులను భారీగా తగ్గిస్తాయి. వయసు పైబడుతున్న కొద్దీ వచ్చే మతిమరుపు వంటి సమస్యలను దూరం చేసి శారీరక, మానసిక ఆరోగ్యాన్ని కాపాడటంలో ఈ కళలు కీలక పాత్ర పోషిస్తాయి.

ప్రత్యామ్నాయం కాదు
సంగీతం వినడం, మ్యూజియంలు సందర్శించడం వల్ల మంచి ఫలితాలు ఉన్నప్పటికీ.. ఇవి శారీరక వ్యాయామానికి ప్రత్యామ్నాయం కావని పరిశోధకులు స్పష్టం చేశారు. కేవలం వీటిపైనే ఆధారపడకుండా.. రోజువారీ వ్యాయామం, మంచి అలవాట్లతో పాటు కళలకు కూడా సమయం కేటాయించాలి. ఆరోగ్యకరమైన జీవనశైలికి ఇవి అదనపు బూస్ట్‌లా పనిచేస్తాయని, చాలామంది ఈ చిన్న విషయాలను నిర్లక్ష్యం చేస్తుంటారని వారు పేర్కొన్నారు.

జీవన నాణ్యతను పెంచే చిన్న మార్పు
సామాజిక, మానసిక ఉల్లాసాన్ని ఇచ్చే పనులు దీర్ఘకాలిక ఆరోగ్యంపై ఎంతటి సానుకూల ప్రభావం చూపుతాయో చెప్పడానికి ఈ అధ్యయనమే నిదర్శనం. నచ్చిన మ్యూజిక్ ఆల్బమ్ వినడం, ప్రదర్శనలు చూడటం వంటి చిన్న పనుల ద్వారా వృద్ధాప్యాన్ని వాయిదా వేయడమే కాకుండా జీవన నాణ్యతను పెంచుకోవచ్చని శాస్త్రవేత్తలు సూచిస్తున్నారు.