అసలు సిసలైన హారర్ మూవీ... 38 సెకన్ల ఫుటేజికి కత్తెర వేసిన భారత సెన్సార్ బోర్డు

ప్రపంచవ్యాప్తంగా ప్రశంసలు అందుకున్న హాలీవుడ్ హారర్ చిత్రం 'అబ్సెషన్'కు భారత సెన్సార్ బోర్డు షాకిచ్చింది. ఈ చిత్రానికి 'A' (అడల్ట్స్ ఓన్లీ) సర్టిఫికెట్ జారీ చేసినప్పటికీ, పలు కీలక సన్నివేశాలపై కత్తెర వేసింది. కర్రీ బార్కర్ దర్శకత్వం వహించిన ఈ సినిమా మే 29న భారత థియేటర్లలో విడుదలైంది.

సెంట్రల్ బోర్డ్ ఆఫ్ ఫిల్మ్ సర్టిఫికేషన్ (సీబీఎఫ్ సీ) ఆదేశాల మేరకు ఈ చిత్రంలో మొత్తం 38 సెకన్ల నిడివి గల సన్నివేశాలను తొలగించారు. ఇందులో సినిమా ద్వితీయార్ధంలో వచ్చే 24 సెకన్ల తీవ్రమైన హింసాత్మక సన్నివేశం, 14 సెకన్ల నిడివి గల శృంగారభరిత సన్నివేశం ఉన్నాయి. వీటితో పాటు ఒక నగ్న దృశ్యాన్ని కూడా వేరే షాట్‌తో భర్తీ చేశారు. ఈ కోతల అనంతరం సుమారు 1 గంట 50 నిమిషాల నిడివితో సినిమా ప్రదర్శితమవుతోంది.

అంతర్జాతీయంగా సైకలాజికల్ హారర్ థ్రిల్లర్‌గా 'అబ్సెషన్' భారీ విజయం సాధించడంతో భారతీయ హారర్ ప్రియులు సినిమాపై ఎన్నో అంచనాలు పెట్టుకున్నారు. అయితే, 'A' సర్టిఫికెట్ ఇచ్చాక కూడా కీలక సన్నివేశాలను తొలగించడంపై వారు తీవ్ర అసంతృప్తి వ్యక్తం చేస్తున్నారు. పెద్దల కోసం ఉద్దేశించిన సినిమాలో ఈ కోతలు ఎందుకని సోషల్ మీడియాలో ప్రశ్నిస్తున్నారు. థియేటర్లలో సెన్సార్ చేసిన వెర్షన్ చూసే బదులు, ఓటీటీలో పూర్తి సినిమా (అన్‌కట్ వెర్షన్) కోసం ఎదురుచూస్తామని పలువురు నెటిజన్లు కామెంట్లు చేస్తున్నారు.

చిత్రంలోని హింస, శృంగార సన్నివేశాలు భారతీయ ప్రేక్షకులకు తగినవి కావని ఎగ్జామినింగ్ కమిటీ భావించినట్లు తెలుస్తోంది. అయితే, ప్రస్తుతానికి ఓటీటీలో అన్‌కట్ వెర్షన్ రిలీజ్‌పై ఎలాంటి స్పష్టత లేదు. ఈ ఘటనతో అంతర్జాతీయ చిత్రాల సెన్సార్‌షిప్‌పై మరోసారి చర్చ మొదలైంది.