గత లవ్ ఫెయిల్యూర్స్ పై శ్రుతి హాసన్ ఓపెన్ కామెంట్స్

ప్రముఖ నటి శ్రుతి హాసన్ తన వ్యక్తిగత జీవితం, ముఖ్యంగా ప్రేమ వ్యవహారాలు, బ్రేకప్‌ల గురించి ఎప్పుడూ దాపరికం లేకుండా మాట్లాడుతూ ఉంటారు. ఇటీవల ఓ ప్రముఖ మ్యాగజైన్‌కు ఇచ్చిన ఇంటర్వ్యూలో, ఆమె తన గత సంబంధాలు, వాటి వల్ల నేర్చుకున్న పాఠాలు, తనకున్న రిగ్రెట్స్ గురించి ఆసక్తికరమైన విషయాలను పంచుకున్నారు.

జీవితంలో ఏమైనా రిగ్రెట్స్ ఉన్నాయా అని అడిగిన ప్రశ్నకు శ్రుతి స్పందిస్తూ, "కొంతమంది చాలా విలువైన వ్యక్తులను నేను బాధపెట్టాను. అలా చేసి ఉండాల్సింది కాదు అనిపిస్తుంది. దాని గురించి ఇప్పుడు కూడా బాధపడుతూ, క్షమాపణలు కోరుతుంటాను. మిగతా విషయాల్లో నాకు ఎలాంటి రిగ్రెట్స్ లేవు" అని అన్నారు. తాను కొన్నిసార్లు సరదాగా, అనాలోచితంగా ప్రవర్తించినా, ఇతరులను బాధపెట్టడం మాత్రం తనకు బాధ కలిగిస్తుందని ఆమె తెలిపారు.

తన ప్రేమకథలు, బ్రేకప్‌ల గురించి మాట్లాడుతూ, "మన అందరి జీవితంలో ఒక ప్రమాదకరమైన మాజీ ఉంటారు. అది తప్ప, మిగతా బంధాలను ఎలాంటి పశ్చాత్తాపం లేకుండానే ముగించాను. ఇతడు ఎన్నో బాయ్‌ఫ్రెండ్ అని కొందరు అడుగుతుంటారు. వారికి అది కేవలం ఒక నంబర్. కానీ నాకు, నేను కోరుకున్న ప్రేమను పొందడంలో విఫలమయ్యాను అనేదానికి గుర్తు. అందుకే నేను దాని గురించి సిగ్గుపడను, కానీ మనిషిగా కొంచెం బాధ ఉంటుంది" అని శ్రుతి వివరించారు. రిలేషన్ షిప్ లో తాను ఎల్లప్పుడూ నిజాయితీగానే ఉన్నానని, భాగస్వాములతో విడిపోయినప్పుడు వారిని నిందించలేదని కూడా ఆమె స్పష్టం చేశారు. తన వైఫల్యాల నుంచి ఎంతో నేర్చుకున్నానని, వాటిని ఎదుగుదలకు సోపానాలుగా భావిస్తానని శ్రుతి పేర్కొన్నారు.

సినిమాల విషయానికొస్తే, గతేడాది 'వీరసింహారెడ్డి', 'వాల్తేరు వీరయ్య', 'సలార్' వంటి విజయవంతమైన చిత్రాల్లో నటించిన శ్రుతి, ప్రస్తుతం లోకేష్ కనగరాజ్ దర్శకత్వంలో రజనీకాంత్ హీరోగా తెరకెక్కుతున్న 'కూలీ' చిత్రంలో నటిస్తున్నారు.