విజయ్ దేవరకొండ న్యూ లుక్ అదిరింది!

టాలీవుడ్ హీరో విజయ్ దేవరకొండ తన లుక్‌తో మరోసారి వార్తల్లో నిలిచారు. ఎప్పుడూ విభిన్నమైన స్టైల్స్‌తో అభిమానులను ఆకట్టుకునే ఆయన, ఇప్పుడు సరికొత్త మేకోవర్‌తో అందరినీ ఆశ్చర్యపరిచారు. జుట్టు పెంచి, క్లీన్ షేవ్‌తో పాటు పదునైన మీసకట్టుతో ఉన్న ఆయన తాజా లుక్ సోషల్ మీడియాలో వైరల్ అవుతోంది. ఈ మార్పు తన తదుపరి సినిమా కోసమేనని స్పష్టమవుతోంది.

ఇటీవలే విజయ్ దేవరకొండ, దర్శకుడు గౌతమ్ తిన్ననూరితో కలిసి ‘కింగ్‌డమ్’ అనే సినిమా షూటింగ్‌ను పూర్తి చేశారు. ఈ చిత్రం కోసం ఆయన షార్ట్ హెయిర్‌తో చాలా సీరియస్ లుక్‌లో కనిపించారు. వచ్చే నెలలో ఈ సినిమా ప్రేక్షకుల ముందుకు రానుంది. ఇప్పుడు విజయ్ తన రూపాన్ని పూర్తిగా మార్చుకోవడం సినీ వర్గాల్లో ఆసక్తిని రేపుతోంది. ప్రస్తుతం ఆయన రెండు కొత్త ప్రాజెక్టులకు సిద్ధమవుతున్నారు.

‘కింగ్‌డమ్’ తర్వాత, విజయ్ తన తదుపరి చిత్రాన్ని దర్శకుడు రవికిరణ్ కోలాతో చేయనున్నారు. ఈ సినిమాకు ‘రౌడీ జనార్దన్’ అనే టైటిల్‌ను కూడా ప్రకటించారు. దీంతో పాటు, ‘శ్యామ్ సింగ రాయ్’ ఫేమ్ రాహుల్ సాంకృత్యాయన్‌ దర్శకత్వంలో మరో ప్రాజెక్ట్‌కు కూడా విజయ్ పచ్చజెండా ఊపారు. ఇప్పుడు ఆయన మార్చిన కొత్త లుక్ ఈ రెండు చిత్రాలలో ఒకదాని కోసమేనని తెలుస్తోంది. అయితే, అది రవికిరణ్ కోలా సినిమా కోసమా లేక రాహుల్ సాంకృత్యాన్ ప్రాజెక్ట్ కోసమా అనే విషయంపై చిత్ర బృందాల నుంచి అధికారిక ప్రకటన వెలువడాల్సి ఉంది. ఈ కొత్త గెటప్‌పై స్పష్టత వస్తే, విజయ్ తదుపరి సినిమా ఎలా ఉండబోతోందనే దానిపై ఒక అంచనాకు రావొచ్చని అభిమానులు ఆసక్తిగా ఎదురుచూస్తున్నారు.