పూజ చేసి.. ఉపవాసం ఉండి.. షెఫాలీ చివరి రోజు గడిచిందిలా!

ఒకే ఒక్క పాట 'కాంటా లగా' పాటతో దేశవ్యాప్తంగా సంచలనం సృష్టించిన నటి షెఫాలీ జరివాలా (42) ఆకస్మిక మరణం అందరినీ దిగ్భ్రాంతికి గురిచేసింది. గత నెల 27న ముంబైలోని తన నివాసంలో ఆమె కుప్పకూలిపోగా, ఆసుపత్రికి తరలించేలోపే ప్రాణాలు కోల్పోయింది. ఉపవాసం ఉంటూనే యాంటీ ఏజింగ్ మందులు, ఇంజెక్షన్ తీసుకోవడం వల్లే ఈ విషాదం జరిగిందని పోలీసులు ప్రాథమికంగా అనుమానిస్తున్నారు.

జూన్ 27న అసలేం జరిగింది?
పోలీసుల కథనం ప్రకారం.. జూన్ 27న షెఫాలీ తన ఇంట్లో సత్యనారాయణ వ్రతం నిర్వహించారు. ఈ సందర్భంగా ఆమె రోజంతా ఉపవాసం పాటించారు. అయితే, ఉపవాసంలో ఉన్నప్పటికీ, యవ్వనంగా కనిపించడం కోసం వాడే యాంటీ ఏజింగ్ మందులతో పాటు చర్మాన్ని ప్రకాశవంతంగా మార్చే గ్లూటాథియోన్ ఇంజెక్షన్‌ను కూడా తీసుకున్నారు. అదే రోజు రాత్రి సుమారు 10:30 గంటల సమయంలో ఆమె ఇంట్లోనే ఒక్కసారిగా కుప్పకూలిపోయారు.

వెంటనే కుటుంబ సభ్యులు ఆమెను అంధేరి వెస్ట్‌లోని బెల్లీవ్యూ ఆసుపత్రికి తరలించారు. అయితే, అప్పటికే ఆమె మరణించినట్టు వైద్యులు నిర్ధారించారు. అనంతరం మృతదేహాన్ని పోస్టుమార్టం నిమిత్తం కూపర్ ఆసుపత్రికి తరలించాల్సిందిగా సూచించారు. రాత్రి 11:15 నుంచి 11:30 గంటల మధ్య ఈ సమాచారం అంబోలి పోలీసులకు చేరడంతో, వారు వెంటనే కూపర్ ఆసుపత్రికి చేరుకుని వివరాలు సేకరించారు.

అందం కోసం వాడిన మందులే ప్రాణం తీశాయా?
ఉపవాసం కారణంగా శరీరంలో శక్తి తక్కువగా ఉన్నప్పుడు, అధిక మోతాదులో యాంటీ ఏజింగ్ మందులు, గ్లూటాథియోన్ ఇంజెక్షన్ తీసుకోవడం వల్ల రక్తపోటు (బీపీ) ఒక్కసారిగా పడిపోయి ఉంటుందని వైద్యులు అనుమానిస్తున్నారు. ఇదే గుండెపోటుకు దారితీసి ఉండవచ్చని ప్రాథమికంగా అంచనా వేస్తున్నారు. షెఫాలీ ఇంట్లో సోదాలు జరిపిన ఫోరెన్సిక్ బృందాలు, యాంటీ ఏజింగ్ మందుల బాక్సులు, గ్లూటాథియోన్ వయల్స్‌తో పాటు, పలు విటమిన్, కొల్లాజెన్ సప్లిమెంట్లను స్వాధీనం చేసుకున్నాయి.

దర్యాప్తు కొనసాగుతోంది
గత నెల 28న ప్రభుత్వ వైద్యుల బృందం షెఫాలీ మృతదేహానికి పోస్టుమార్టం నిర్వహించి, మొత్తం ప్రక్రియను వీడియో రికార్డ్ చేసింది. మృతికి కచ్చితమైన కారణం తెలుసుకోవడం కోసం ఆమె శరీరంలోని కీలక అవయవాల నమూనాలను ముంబైలోని కలీనా ఫోరెన్సిక్ సైన్స్ లేబొరేటరీకి పంపించారు. పోస్టుమార్టం నివేదిక రెండు, మూడు రోజుల్లో రానుండగా, విసరా నివేదిక రావడానికి 50 నుంచి 90 రోజుల సమయం పట్టవచ్చని అధికారులు తెలిపారు.

ఈ ఘటనపై అంబోలి పోలీస్ స్టేషన్‌లో అనుమానాస్పద మృతిగా కేసు నమోదు చేశారు. షెఫాలీ భర్త పరాగ్ త్యాగి, ఇతర కుటుంబ సభ్యులు, ఇంట్లోని పనివారు, సన్నిహితుల నుంచి పోలీసులు వాంగ్మూలం తీసుకున్నారు. ఆమె మృతిపై ఎవరూ ఎలాంటి అనుమానాలు వ్యక్తం చేయలేదని పోలీసులు స్పష్టం చేశారు. ప్రస్తుతం పోస్టుమార్టం, విసరా నివేదికలు వచ్చిన తర్వాతే షెఫాలీ మృతికి గల కచ్చితమైన కారణాలు తెలుస్తాయని దర్యాప్తు అధికారులు వెల్లడించారు.