నిన్న‌టి విధ్వంస‌క‌ర ఇన్నింగ్స్ త‌ర్వాత‌.. సోషల్ మీడియాలో వైభవ్ మూడు పదాల సందేశం

ఐపీఎల్ 2026లో ఓ యువ సంచలనం క్రికెట్ ప్రపంచాన్ని తనవైపు తిప్పుకున్నాడు. రాజస్థాన్ రాయల్స్‌కు చెందిన 15 ఏళ్ల వైభవ్ సూర్యవంశీ, బుధవారం సన్‌రైజర్స్ హైదరాబాద్‌తో జరిగిన ఎలిమినేటర్ మ్యాచ్‌లో విధ్వంసకర ఇన్నింగ్స్‌తో తన జట్టును గెలిపించాడు. కేవలం 29 బంతుల్లో 97 పరుగులు చేసిన వైభవ్, క్రిస్ గేల్ పేరిట ఉన్న ఫాస్టెస్ట్ టీ20 సెంచరీ రికార్డును త్రుటిలో చేజార్చుకున్నాడు. అయినప్పటికీ, అతని మెరుపు ఇన్నింగ్స్ రాజస్థాన్‌కు కీలక విజయాన్ని అందించి, ఫైనల్ ఆశలను సజీవంగా నిలిపింది.

ఈ విజయంతో రాజస్థాన్ రాయల్స్ క్వాలిఫయర్ 2కు అర్హత సాధించింది. శుక్రవారం గుజరాత్ టైటాన్స్‌తో తలపడనుంది. ఈ మ్యాచ్‌లో గెలిచిన జట్టు, ఫైనల్‌లో రాయల్ ఛాలెంజర్స్ బెంగళూరుతో అమీతుమీ తేల్చుకుంటుంది. మ్యాచ్ అనంతరం తన ఇన్‌స్టాగ్రామ్‌లో వైభవ్.. 'ఇంకా కావాలనే ఆకలి' (Hungry for more) అంటూ మూడు పదాల సందేశంతో తన ఆత్మవిశ్వాసాన్ని ప్రదర్శించాడు.

వైభవ్ ఆటతీరు, పరిణతిపై ఏబీ డివిలియర్స్ ప్రశంసల వర్షం 
వైభవ్ అద్భుత ప్రదర్శనపై దక్షిణాఫ్రికా మాజీ దిగ్గజం ఏబీ డివిలియర్స్ ప్రశంసల వర్షం కురిపించాడు. "కేవలం 15 ఏళ్ల వయసులో ఇంతటి ఆట అవగాహన, పరిణతి చూపడం అసాధారణం" అని కొనియాడాడు. ఒత్తిడితో కూడిన నాకౌట్ మ్యాచ్‌లో అద్భుతమైన షాట్ సెలక్షన్‌తో పాటు వైభవ్ చూపిన ప్రశాంతత తనను ఎంతగానో ఆకట్టుకుందని డి విలియర్స్ జియోస్టార్‌తో అన్నాడు.