'నార్కోటిక్స్' రైడ్‌... పోలీసుల విచార‌ణ‌కు హాజ‌రైన‌ ప్ర‌ముఖ న‌టుడు

ప్ర‌ముఖ మ‌ల‌యాళ న‌టుడు షైన్ టామ్ చాకో ఈరోజు పోలీసుల విచార‌ణ‌కు హాజ‌ర‌య్యారు. త‌న న్యాయ‌వాదితో క‌లిసి ఇవాళ ఉద‌యం 10 గంట‌ల‌కు ఎర్నాకులం పీఎస్‌కు వెళ్లారు. ఇటీవ‌ల ఓ హోట‌ల్‌పై  'నార్కోటిక్స్' రైడ్ జ‌రిగిన స‌మ‌యంలో ఆయ‌న అక్క‌డి నుంచి ప‌రారైన‌ట్లు వార్త‌లు వ‌చ్చిన విష‌యం తెలిసిందే. ఈ విష‌యంతో పాటు మాద‌క ద్ర‌వ్యాల వినియోగంపై చాకోను పోలీసులు ప్రశ్నించే అవ‌కాశం ఉంద‌ని స‌మాచారం. 

ఇక కొచ్చిలోని ఓ హోట‌ల్‌లో డ్ర‌గ్స్ తీసుకుంటున్నార‌నే స‌మాచారంతో నార్కోటిక్ సిబ్బంది రైడ్ చేసింది. అయితే, పోలీసులు అక్క‌డికి రావ‌డానికి కొద్దిసేప‌టి ముందే షైన్ టామ్ చాకో అక్క‌డి నుంచి పారిపోయిన‌ట్లు వార్త‌లు వ‌చ్చాయి. ఆ స‌మ‌యంలో ఆ హోట‌ల్‌ మూడో అంత‌స్తులో ఉన్న ఆయ‌న‌... కిటికీ ద్వారా సెకండ్ ఫ్లోర్‌లోకి దూకి మెట్ల మార్గంలో ప‌రుగులు పెట్టారు. ఇందుకు సంబంధించిన దృశ్యాలు అక్క‌డి సీసీటీవీ కెమెరాల్లో రికార్డ‌య్యాయి. ఆ వీడియో బ‌య‌ట‌కు రావ‌డంతో నెట్టింట వైర‌ల్‌గా మారింది. 

మ‌రోవైపు చాకోపై న‌టి విన్సీ అలోషియస్ తీవ్ర ఆరోపణలు చేశారు. ఆయ‌న‌ డ్రగ్స్ మ‌త్తులో ఉన్నప్పుడు త‌న‌తో అనుచితంగా ప్రవర్తించాడని ఆమె మలయాళం మూవీ ఆర్టిస్ట్స్ అసోసియేషన్ (AMMA)లో ఫిర్యాదు కూడా చేశారు.