మోహన్‌లాల్ 'వృషభ' ఫస్ట్ లుక్ విడుదల

మలయాళ సూపర్ స్టార్ మోహన్‌లాల్ బుధవారం తన 65వ పుట్టినరోజు జరుపుకున్నారు. ఈ సందర్భంగా, ఆయన నటిస్తున్న పాన్-ఇండియా చిత్రం 'వృషభ' నుంచి ఫస్ట్ లుక్‌ను చిత్రబృందం విడుదల చేసింది. ఇందులో మోహన్‌లాల్ భీకరమైన యోధుడి అవతారంలో కనిపించి అభిమానులను ఆశ్చర్యపరిచారు. బంగారు-గోధుమ వర్ణంలో డ్రాగన్ పొలుసుల వంటి నమూనాలతో  రూపొందించిన కవచం ధరించి, పొడవాటి జుట్టు, దట్టమైన గడ్డం, నుదుట తెల్లటి తిలకంతో ఆయన లుక్ ఎంతో ఆసక్తికరంగా ఉంది. సంప్రదాయ ఆభరణాలు, ముక్కుపుడకతో ఆయన గంభీరమైన రాచరికపు వీరుడిలా కనిపించారు.

ఈ ఫస్ట్ లుక్‌ను సోషల్ మీడియా వేదికగా పంచుకున్న మోహన్‌లాల్, "ఇది చాలా ప్రత్యేకం. నా అభిమానులందరికీ అంకితం. నిరీక్షణ ముగిసింది. తుపాను మేల్కొంది. గర్వంగా, శక్తివంతంగా 'వృషభ' ఫస్ట్ లుక్‌ను ఆవిష్కరిస్తున్నాను. ఇది మీ ఆత్మను ఉత్తేజపరిచి, కాలంతో పాటు ప్రతిధ్వనించే కథ" అని సంతోషాన్ని వ్యక్తం చేశారు. తన పుట్టినరోజున ఈ లుక్‌ను విడుదల చేయడం మరింత సంతోషాన్నిచ్చిందని, అభిమానుల ప్రేమే తనకు గొప్ప బలమని ఆయన తన పోస్ట్‌లో పేర్కొన్నారు.

నంద కిశోర్ దర్శకత్వం వహిస్తున్న ఈ భారీ బడ్జెట్ చిత్రాన్ని కనెక్ట్ మీడియా, బాలాజీ టెలిఫిల్మ్స్ సమర్పణలో శోభా కపూర్, ఏక్తా ఆర్ కపూర్, సీకే పద్మ కుమార్, వరుణ్ మాథుర్, సౌరభ్ మిశ్రా, అభిషేక్ ఎస్ వ్యాస్, విశాల్ గుర్నాని, జుహీ పరేఖ్ మెహతా తదితరులు సంయుక్తంగా నిర్మిస్తున్నారు. మలయాళం, తెలుగు భాషల్లో ఏకకాలంలో చిత్రీకరించిన 'వృషభ'ను 2025 అక్టోబర్ 16న తెలుగు, మలయాళం, హిందీ, తమిళం, కన్నడ భాషల్లో ప్రపంచవ్యాప్తంగా విడుదల చేయనున్నట్లు నిర్మాతలు ప్రకటించారు.
ఇదిలా ఉండగా, మోహన్‌లాల్ కీలక పాత్రలో నటిస్తున్న మరో చిత్రం 'కన్నప్ప' నుంచి కూడా ఆయన పుట్టినరోజు సందర్భంగా చిత్రబృందం ప్రత్యేక పోస్టర్‌తో పాటు ఓ చిన్న గ్లింప్స్‌ను విడుదల చేసి అభిమానులకు డబుల్ ట్రీట్ ఇచ్చింది. 'కన్నప్ప' చిత్ర నటుడు, నిర్మాత మంచు విష్ణు, మోహన్‌లాల్‌కు జన్మదిన శుభాకాంక్షలు తెలుపుతూ, "సినిమా లెజెండ్స్‌లో ఒకరైన శ్రీ మోహన్‌లాల్ గారికి జన్మదిన శుభాకాంక్షలు. లెజెండ్‌తో స్క్రీన్ షేర్ చేసుకోవడం గౌరవంగా ఉంది. ఆయన 'కన్నప్ప'లో, నా జీవితంలో భాగమైనందుకు ధన్యవాదాలు" అని సోషల్ మీడియాలో పోస్ట్ చేశారు.