గ్లోబల్ స్టార్ ప్రియాంక చోప్రా, దర్శకధీరుడు ఎస్ఎస్ రాజమౌళి తనయుడు కార్తికేయతో కలిసి స్టెప్పులేశారు. దీనికి సంబంధించిన వీడియో ప్రస్తుతం సోషల్ మీడియాలో అందరి దృష్టిని ఆకర్షిస్తోంది. సూపర్ స్టార్ మహేశ్ బాబు హీరోగా వారణాసి నేపథ్యంలో ఓ భారీ చిత్రం తెరకెక్కుతున్న సంగతి తెలిసిందే. ఈ చిత్రంలో ప్రియాంక చోప్రా కథానాయికగా నటిస్తుండగా, కార్తికేయ సహ నిర్మాతగా కీలక బాధ్యతలు నిర్వర్తిస్తున్నారు.

తాజాగా కార్తికేయ పుట్టినరోజు సందర్భంగా ప్రియాంక ఆయనకు ప్రత్యేకంగా శుభాకాంక్షలు తెలిపారు. ఈ సందర్భంగా ఇద్దరూ కలిసి ‘ఊర్వశీ ఊర్వశీ టేకిట్ ఈజీ ఊర్వశీ’ పాట ఇన్స్‌ట్రుమెంటల్ మ్యూజిక్‌కు సరదాగా కాలు కదిపారు. ఈ వీడియోను తన ఎక్స్ ఖాతాలో పంచుకున్న ప్రియాంక, కార్తికేయకు ప్రత్యేకంగా బర్త్ డే విషెస్ తెలియజేశారు.

"టేక్ ఇట్ ఈజీ మై ఫ్రెండ్! తెరవెనుక ఉండి అన్ని పనులూ సైలెంట్‌గా చక్కబెట్టే నీకు పుట్టినరోజు శుభాకాంక్షలు కార్తికేయ. ఈ సినిమా ప్రయాణంలో నీతో కలిసి డ్యాన్స్ చేయడం చాలా సంతోషంగా ఉంది" అని ప్రియాంక తన పోస్టులో పేర్కొన్నారు. ప్రస్తుతం ఈ వీడియో సోషల్ మీడియాలో వైరల్‌గా మారింది.